بیرلشگن ملتلر تشکیلاتی‌نینگ افغانستانده‌گی یاردم اداره‌سی (یوناما) نینگ افغانستانده‌گی انسان حقوقلری حالتی بۉییچه ینگی گزارشیده طالبلرینگ کابلده‌گی اَیریم مؤسسه‌لرنی یاپگنی و بعضی شیعه‌لرنی حبسگه آلگنی تصدیقلنگن.
گزارش ایتیلیشیچه، ۲۷-سپتمبر کونی طالبلر عدلیه وزیرلیگی خادملری کابل‌نینگ غربي حدودلریده اساسن شیعه‌لرگه خدمت کۉرسه‌ته‌دیگن یېتّیته مرکزنی یاپگن.
یونامانینگ معلوم قیلیشیچه، بو مرکزلر ترکیبیده بیر طبي کلینیک، ایکّیته تعلیم مؤسسه‌سی، بیر سپورت کلوپی، ایکّیته دیني مدرسه و بیرته مسجد بۉلگن.
یوناما گزارشیده، شونینگدېک، طالبلر عدلیه وزیرلیگی خادملری ۵ـسپتمبر کونی شیعه‌لرگه قره‌شلی خاتم النبین بیلیم یورتی‌نینگ ۲۸ نفر اېرکک خادیمینی حبسگه آلگنی قید اېتیلگن. گزارش‌گه کۉره، تۉرت نفر استاد اۉشه کونی، قالگن ۲۴ کیشی اېسه ۸ و ۹-سپتمبر کونلری آزاد قیلینگن.
یوناما شونینگدېک، طالبان عالي تحصیلات وزیرلیگی ۱۶-سپتمبر کونی خاتم النبیین بیلیم یورتی و اونینگ غزنی شهریده‌گی شعبه‌سی‌نینگ فعالیت حجتینی بېکار قیلگنینی بیلدیرگن.
یونامانینگ انسان حقوقلری بۉلیمی، شونینگدېک، ۶–۹-سپتمبر کونلری خاتم اانبیین بیلیم یورتیده‌گی واقعه بیلن باغلیق حالده کمیده آلتی کیشی نینگ حبسگه آلینگنینی حجتلشتیرگن.
یوناما انسان حقوقلری بۉلیمی گزارشیده ایتیلیشیچه، بو شخصلر طالبلرنینگ خاتم النبیین بیلیم یورت‌گه نسبتاً کۉرگن چاره‌لرینی تنقید قیلگنی و اولرگه قرشی ناراضیلیک بیلدیرگنی اوچون حبسگه آلینگن همده بیر نېچه ساعتدن یېتّی کونگچه مدت دوامیده قماقده سه‌قلنگن.
یوناما گزارشیده، شونینگدېک، طالبلر خاتم اولانبیا مدرسه‌سینی یاپگنی و اونینگ بیر قطار خادملری همده طلبه‌لرینی حبسگه آلگنینی تصدیقله‌گن. بیراق اولر اۉشه کون نینگ اۉزیده آزاد قیلینگن.
طالبلر سۉنگگی آیلرده کابل شهریده شیعه‌لر و هزاره‌لرگه نسبتاً باسیمنی کوچه‌یتیرگن.
بو گروه، شونینگدېک، خاتم النبیین مدرسه‌سی، «تمدن» و «راه فردا» تلویزیونلری اداره‌سی همده «شیعه‌لر عالی کمیسیونی»نی یاپگن، اَیریم شیعه نفوذلی شخصلرینی اېسه حبسگه آلیب، قماققه تشله‌گن.
بوندن تشقری، طالبلر کابل نینگ غربي قِسمیده جایلشگن، اهالیسی اساسن هزاره و شیعه‌لردن عبارت «امیدسبز» شهرچه‌سینی «امارتی» دېب اعلان قیلیب، اهالیگه حدودنی ترک اېتیش حقیده بویروق بېرگن.
