پاکستان عامه‌وي اخبارات واسطه‌لری‌نینگ خبر بېریشیچه، «نامعلوم قوراللی شخصلر» بلوچستان ایالتی‌نینگ مستونگ تومنیدن اوشبو مملکتده تعلیم آله‌یاتگن ۲۰ کیشی پولیس خادیمینی اۉغیرلب کېتگن.
«دان» گزیته‌سی بوگون (شنبه، ۲۵-میزان) بلوچستان گ‌نینگ یوقاری مرتبه‌لی رسميسیگه ته‌یه‌نیب یازیشیچه، بو خادملر دَم آلیش کونلرینی اویلریده اۉتکزیش اوچون یۉلگه چیققن پیتده، قوراللی شخصلر اولرنی کوېته–کراچی عمومی قتناوو یۉلیده اۉغیرلب کېتگن.
بلوچستان رسميسی‌نینگ ایتیشیچه، موتر سایکلده بۉلگن و اتوماتیک قوراللر بیلن قوراللنگن شخصلر اوّل اوشبو پولیس خادملری کېته‌یاتگن موترنی توخته‌تگن، سۉنگ اولرنی موتر بیلن بیرگه نامعلوم جایگه آلیب کېتگن.
شو بیلن بیرگه، بلوچستان رسميلری قوراللی شخصلر موتر هیداوچیسی و ینه اوچ نفر یۉلاوچینی آزاد قیلگنینی تصدیقله‌گن.
«دان» گزیته‌سی‌نینگ خبریگه کۉره، پاکستان خوفسیزلیک کوچلری اوشبو خادملرنی تاپیش اوچون اطرافده‌گی تاغلرده عملیات باشله‌گن، بیراق حاضرگچه اولرنینگ قه‌یېرده سقلنه‌یاتگنی حقیده هېچ قنده‌ی معلومات آلینمه‌گن.
حاضرگچه هېچ بیر گروه پاکستان پولیسی خادملرینی اۉغیرلب کېتیش مسوولیتینی اۉز ذمّه‌سیگه آلمه‌گن.
افغانستان بیلن چېگره‌داش پاکستان‌نینگ بلوچستان ایالتی مملکتده‌گی خوفسیزلیک جهتیدن اېنگ بې‌قرار حدودلردن بیریدیر. اوشبو ایالتده قوراللی عصیانچیلر بیر نېچه بار دولت کوچلریگه قرشی قانلی هجوملر اویوشتیرگن و آدم اۉغیرلش حالتلریگه قۉل اورگن.
