پاکستان و ایران اۉرته‌سیده‌گی چېگره اۉتیش بندری یاپیلگنیدن سۉنگ، پاکستان‌نینگ بلوچستان محلي حکومتی خوفسیزلیک بیلن باغلیق خواطرلر و قاچاقگه قرشی کوره‌شیش سببلی اۉز چېگره‌لرینی یاپگنینی معلوم قیلدی.
پاکستان‌نینگ «دان» گزیته‌سی بوگون (یک‌شنبه، ۲۶ میزان) خبر بېریشیچه، بلوچستان ایالتی محلي حکومتی مطبوعات سوزلاوچیسی شاهد رند ایکّی رسمي چېگره اۉتیش بندری گبد-ریمدان و تفتان یاپیلگنینی بیلدیرگن.
شاهد رندنینگ ایتیشیچه، چېگره پونکتلرینی یاپیشدن مقصد خوفسیزلیک بیلن باغلیق خواطرلرنی برطرف اېتیش، قاچاق نینگ آلدینی آلیش و چېگره باشقرووی تیزیمینی ینه‌ده ثمره‌لی قیلیشدن عبارت.
او «بو چاره چېگرهنینگ هر ایکّی تامانیده خوفسیزلیک و اداری ایشلر حالتینی یخشیلش اوچون ضرور اېدی»، دېب تأکیدله‌گن.
رند، شونینگدېک، ایکّی دولت‌نینگ یوقاری مرتبه‌لی رسميلری معمالرنی حل قیلیش اوچون علاقه‌ده اېکنینی و چېگره یقین آره‌ده قَیته آچیلیشی ممکنلیگینی ایتگن.
شو بیلن بیرگه، ایران تشقی ایشلر وزیرلیگی مطبوعات سوزلاوچیسی اسماعیل بقایی چېگره اۉتیش پونکتلری فعالیتی‌نینگ توخته‌تیلیشینی وقتینچه‌لیک دېب اته‌ب، بونگه تخنیکي معمالر سبب بۉلگنینی بیلدیرگن.
اونینگ ایتیشیچه، تهران و اسلام آباد معمانی حل قیلیش همده چېگره فعالیتینی عادتده‌گی حالتگه قَیتریش اوچون مذاکره‌لر آلیب بارماقده.
کویته تجارت-صناعت اتاقی هم سوداگرلردن کېینگی خبرگچه ایران بیلن ینگی واردات و صادرات بویورتمه‌لرینی توخته‌تیب توریشنی سۉره‌گن.
ایکّی تامانله‌مه چېگرهنینگ هر ایکّی تامانیده سویولتیریلگن گاز، گوروچ، مېوه و اساسي احتیاج تاورلرینی آلیب کېته‌یاتگن یوزلب یوک مو‌ترلری توخته‌ب قالگن.
گبد-ریمدان و تفتان یۉنه‌لیشی آرقه‌لی هر کونی ۴ مینگ تُن‌دن آرتیق سویولتیریلگن گاز پاکستانگه آلیب کیریلردی. سوداگرلر وضعیت دوام اېته‌دیگن بۉلسه، سویولتیریلگن گاز تقچیللیگی، نرخلرمینگ آشیشی و کتّه اقتصادي ضرر یوزه‌گه کېلیشی ممکنلیگیدن آگاهلنتیرگن.
