بویوک بریتانیا نینگ دېنگیز خوفسیزلیگی تشکیلاتی بوگون، چهارشنبه کونی (۲۹ـمیزان)، عمان ساحللری یقینیده، هرمز بۉغازی یقینیده بیر کېمه «نامعلوم سنارید» نشانیگه ایلنگنی و بو‌نینگ عاقبتیده یانغین چیققنینی معلوم قیلدی.
بویوک بریتانیانینگ دېنگیز تجارت عملیاتلری تشکیلاتی (اوکمتا) خبریگه کۉره، تانکېر بخا شهریدن ۱۱ دېنگیز مِیلی، یعنی تخمیناً ۲۰ کیلومتر اوزاقلیکده بۉلگن و حاضر لنگر تشلب توریبدی.
تشکیلات: «برچه اېکیپاژ اعضالری ساغ-سلامت اېکنی خبر قیلیندی. حاضرچه اوشبو حادثه‌‌نینگ اطراف-محیطگه تأثیری حقیده هېچ قنده‌ی معلومات آلینمه‌گن»، دېب بیلدیردی.
مذکور تشکیلات ینه بیر حادثه حقیده هم خبر بېردی. بو حادثه سه‌شنبه کونی عراق ساحللری یقینیده صادر بۉلگن.
اوکمتا معلوماتیگه کۉره، فاو شه‌هریدن ۳۰ دېنگیز مِیلی اوزاقلیکده بیر تانکرگه سنارید تېککن. بیراق حادثه عاقبتیده قربانلر یاکه مادّي ضرر قید اېتیلمه‌گن.
یقین شرقده‌گی اوروش فبروری آیی آخریده، امریکا و اسرایل‌نینگ ایرانگه قرشی هجوملری آرتیدن باشلنیشیدن اوّل، دنیاده‌گی نفت و گازنینگ قریب ۲۰ فایزی هرمز بۉغازی آرقه‌لی تشیلگن.
شوندن بېری تهران اوشبو بۉغاز آرقه‌لی دېنگیز قتناوینی کېسکین چېکلب، ایران رخصتیسیز اوندن اۉتیشگه حرکت قیله‌یاتگن کېمه‌لرگه منتظم روشده هجوم قیلماقده.
واشنگتن اېسه بونگه جوابن ایران بندرلرینی بلاکده قیلیشنی دوام اېتتیرماقده و ایکّی دولت اۉرته‌سیده‌گی مذاکره‌لر باشی بېرک کۉچه‌گه کیریب قالگن.
سۉنگگی کونلرده امریکا هرمز بۉغازی آرقه‌لی کوزه‌تیب آلیب اۉته‌یاتگن کېمه‌لر سانی کۉپه‌یگنی همده تهران دېنگیز قتناوی اوستیدن نظارتنی سقلب قالیشگه اورینه‌یاتگنی بیر پیتده، اوشبو سوو یۉلی آرقه‌لی اۉتیشگه حرکت قیله‌یاتگن کېمه‌لرگه قرشی هجوملر هم کۉپه‌یگن.
