تورکيه، قطر، پاکستان و اندونیزیادن عبارت تۉرت مسلمان دولتی همکارلیکنی کېنگه‌یتیریش و مدافعه صلاحیتینی مستحکملش بۉییچه کېلیشوو امضاله‌دی.
رویترز خبریگه کۉره، تورکيه مدافعه وزیرلیگی «بدر کیلیشووی» بوگون، چهارشنبه کونی (۲۹ میزان)، قطر پایتختی دوحه‌ده امضالنگنینی معلوم قیلگن.
وزیرلیک‌نینگ بیلدیریشیچه، مذکور کېلیشوو اقتصادي جهتدن کتّه اهمیتگه اېگه بۉلیب، اونینگ مقصدی حربي محصولاتلر ایشلب چیقریش ساحه‌سیده‌گی همکارلیکنی کوچه‌یتیریش، حربي صلاحیتنی آشیریش همده حربي-تخنیکي تیارگرلیک، تدقیقات و رواجلنتیریش یۉنه‌لیشلریده‌گی همکارلیککه کۉمکلشیشدن عبارت.
تورکيه مدافعه وزیرلیگی شونده‌ی دېگن: «اوشبو تشبث هر بیر دولت نینگ حربي ایشلب چیقریش ساحه‌سیده‌گی اۉزیگه خاص امکانیتلریدن فایده‌لنیش آرقه‌لی همکارلیک و انتیگراسیون‌نی یېنگیللشتیره‌دی، مدافعه صناعتی صلاحیتینی آشیره‌دی همده اتفاقچی و دۉست دولتلر نینگ احتیاجلرینی تأمینلش امکانینی بېره‌دی.»
تورکيه مدافعه صناعتی تشکیلاتی رهبری لوق گورگون اونینگ فکریچه، اوشبو شرطنامه قطر، پاکستان، اندونیزیا و تورکيه‌‌نینگ امکانیتلرینی انیق و عملي لایحه‌لرگه ایلنتیریشگه یاردم بېریشینی ایتگن.
اونینگ قۉشیمچه قیلیشیچه، مذکور کېلیشوو قۉشمه ایشلب چیقریش و تکنالوژي‌لرنی رواجلنتیریش اوچون «استراتیژیک همکارلیک» پای‌دېوارینی یره‌ته‌دی.
ناتوده‌گی ایکّینچی ییریک اوردوگه و کوچلی مدافعه صناعتیگه اېگه تورکيه فارس کۉرفزی دولتلریگه، جمله‌دن، اۉزی نینگ حربي بازه‌سی جایلشگن قطرگه مدافعه تیزیملرینی مستحکملشده یاردم بېرماقده.
تورکيه اگوست آییده پاکستان و سعوديه عربستانی بیلن بیرگه‌لیکده «مکه پیمانی» دېب اته‌لووچی ینه بیر کېلیشوونی امضاله‌گن اېدی. اونگه کۉره، اوشبو اوچ دولتدن بیریگه قیلینگن هجوم قالگن ایکّی دولتگه قیلینگن هجوم صفتیده بهالنه‌دی.
