پاکستان عامه‌وي اخبارات واسطه‌لری «بلوچستان آزادلیک اوردوسی» و «بلوجستان آزادلیک جبهه‌سی» پاکستان‌نینگ گوادر بندری همده پاکستان و ایران اۉرته‌سیده‌گی ریمدان چېگره اۉتکزیش پونکتیده علیحده هجوملر اویوشتیرگنی حقیده خبر بېرماقده.
«بلوچستان پالس» نشری‌نینگ خبریگه کۉره، بو هجوملر تیناوون (پنج‌شنبه، ۳۰ میزان) صادر بۉلگن.
اوشبو نشر معلوماتیگه کۉره، «بلوچستان آزادلیک اوردوسی»نینگ قوراللنگن اعضالری گوادرده یۉلاوچیلر و تجاري یوکلرنی تشياتگن موترلرگه هجوم قیلگن. هجوم عاقبتیده اوچ کیشی، جمله‌دن، یوک مو‌تری هیداوچیسی یره‌لنگن.
پاکستان‌نینگ «اکسپرس تریبون» گزیته‌سی‌نینگ یازیشیچه، واقعه‌دن سۉنگ پاکستان چېگره کوچلری واقعه جاییگه یېتیب باریب، حدودنی قورشه‌ب آلگن. نتیجه‌ده «اوچ ترورچی» اۉلدیریلگن.
پاکستان ایچکی ایشلر وزیری محسن نقوی هم اوشبو واقعه‌ده اوچ نفر هجومچی اۉلدیریلگنینی تصدیقله‌گن و گروه نامینی ایتمه‌گن حالده، اولرنی «ترورچیلر» دېب اته‌گن. پاکستان حکومتی و اونگه یقین عامه‌وي اخبارات واسطه‌لری برچه قوراللی مخالف گروهلرنی «ترورچی» دېب اته‌یدی.
کېچه ینه بیر علیحده هجومده قوراللنگن شخصلر پاکستان و ایران چېگره‌سیده‌گی ۲۵۰رقملی سودا اۉتکزیش بندریگه هجوم قیلیب، تازه مېوه آرتیلگن اۉنلب یوک مو‌ترلریگه اۉت قۉیگن.
«بلوچستان پالس» نشری هجوم عاقبتیده هجومچیلر و پاکستان خوفسیزلیک کوچلری اۉرته‌سیده قوراللی تۉقنه‌شوو یوز بېرگنینی یازگن.
مذکور هجوم «بلوچستان آزادلیک جبهه‌سی»گه نسبت بېریلگن. حاضرچه یاقیب یوباریلگن یوک مو‌ترلری نینگ انیق سانی و احتمالي قربانلر حقیده باتفصیل معلومات بېریلمه‌گن.
ایران عامه‌وي اخبارات واسطه‌لری، جمله‌دن، «تسنیم» اخبارات آژانسی هم پاکستان حدودیده یوک مو‌ترلریگه اۉت قۉییلگنیدن سۉنگ، ریمدان چېگره اۉتکزیش پونکتی ینه یاپیلگنینی خبر قیلگن.
بو حالت پاکستان جاري هفته‌‌نینگ باشیده گوادر ریمدان و تفتان چېگره اۉتکزیش پونکتلریده تجارت فعالیتینی توخته‌تگنیدن کېین یوز بېردی. اوشبو اۉتکزیش پونکتلری پاکستان اوردوسی باشلیغی عاصم منیر نینگ تهرانگه تشریفیدن سۉنگ قَیته آچیلگن اېدی.
