فرانسهدهگی ناراضیلیک نمایشلرینی تشکیل اېتووچیلردن بیری بۉلگن «سی‌جی‌تی» کسبه اویوشمه‌سی ناراضیلیکلرنینگ ینگی باسقیچیده مملکت بۉیلب قریب ۸۰۰ مینگ کیشی قتنه‌شگنینی معلوم قیلدی.
فرانسه اخبارات آژانسی خبریگه کۉره، اوشبو کسبه اویوشمه‌سی بوگون (شنبه، ۲ عقرب) فقط پریج شهری‌نینگ اۉزیده قریب ۲۵۰ مینگ کیشی کۉچه‌لرگه چیققنینی بیلدیرگن.
بیراق فرانسه پولیسی پاریس‌ده‌گی نمایش اشتراکچیلری سانینی قریب ۱۱۰مینگ کیشی دېب بهاله‌گن.
فرانسه ایچکی ایشلر وزیرلیگی هم بوگون کېچقورون مملکت بۉیلب نمایشلرده جمعی ۴۱۰ مینگ کیشی قتنه‌شگنینی معلوم قیلگن.
فرانسهدهگی ناراضیلیکلر دستلب اۉقووچیلر تامانیدن مکتبلرده‌گی شرایطلرنی یخشیلش و خادملر یېتیشماوچیلیگینی برطرف اېتیش طلبی بیلن باشلنگن، کېینچه‌لیک یشش خرجتلری‌نینگ آشیشیگه قرشی ناراضیلیکلرگه ایلنگن.
فرانسه‌‌نینگ اَیریم حدودلریده، جمله‌دن، پاریس‌ده نمایشلر زۉرآورلیکلرگه هم ایلنیب، نمایشچیلر جماعت ملکیگه ضرر یېتکزیشده عیبلنگن.
فرانسه پولیسی اۉتگن هفته‌ده‌گی ناراضیلیکلر آرتیدن ۲ مینگ ۷۰۰ دن آرتیق کیشینی حبسگه آلگن و مملکت نینگ تورلی حدودلریده حرکتلنیشگه چېکلاولر جاري قیلگن.
فرانسه پولیسی ناراضیلیکلرنینگ ینگی باسقیچی باشلنیشی عرفه‌سیده یوقاری شَی حالتگه کېلتیریلگن. مملکت ایچکی ایشلر وزیرلیگی خوفسیزلیکنی تأمینلش اوچون ۷۰مینگ نفر خادم سفربر اېتیلیشینی معلوم قیلگن.
