پاکستان اوردوسی مملکت‌نینگ ایکّی عسکری خیبر-پختونخوا ایالتی‌نینگ دېره اسمایل‌خان منطقه‌سیده اۉتکزیلگن عملیات دوامیده هلاک بۉلگنینی معلوم قیلدی.
پاکستان اوردوسی بیاناتیده ایتیلیشیچه، اوشبو عملیات کېچه (شنبه، ۲ عقرب) دېره اسمایل‌خان تومنی‌نینگ «زرکانی» منطقه‌سیده «فتنه-خوارج» («پاکستان طالبان حرکتی» — تی‌تی‌پی) عنصرلریگه قرشی اۉتکزیلگن.
پاکستان اوردوسی اوشبو عملیات دوامیده «هندستانگه علاقه‌دار» دېب اته‌لگن آلتی نفر هم اۉلدیریلگنینی بیلدیردی.
پاکستان اوردوسی معلوماتیگه کۉره، بو شخصلر خوفسیزلیک کوچلری و حقوق-ترتیباب اداره‌لریگه قرشی کۉپلب «ترورچیلیک حرکتلری»، شونینگدېک، «بې‌گناه فقرالرنی اۉلدیریش»ده اشتراک اېتگن.
پاکستان اوردوسی بیاناتیگه کۉره، عملیات دوامیده اولردن معلوم مقدارده قورال-یراغ و اۉق-داریلر هم تاپیلیب، مصادره قیلینگن.
طالبان افغانستان‌ده حاکمیتنی قَیته قۉلگه آلگنیدن سۉنگ، افغانستان بیلن چېگره‌داش خیبر-پختونخوا ایالتی پاکستان‌نینگ اېنگ خوفلی ولایتیگه ایلنگن و بو حدودده بیر نېچه بار قانلی ترورچیلیک هجوملری صادر بۉلگن.
کۉپلب هجوملر اوچون جوابگرلیکنی «پاکستان طالبلر حرکتی» (تی‌تی‌پی) اۉز ذمّه‌سیگه آلگن.
پاکستان رسميلری بو هجوملر افغانستان توپراغیدن فایده‌لنیلگن حالده عملگه آشیریله‌یاتگنینی دعوا قیله‌دی، بیراق طالبلر بو دعوانی رد اېته‌دی.
