یازوچی: محبوبالله توران
ستمگه، عدالتسیزلیککه، باسقینچیلیک و زۉراوانلیکلرگه قرشی باش کۉتریب، قیلیچ اۉینتگن و هر دایم حُریت اوچون باتمان-باتمان بلالرنی باشینگیزدن اولاقتیرگن اې قدرتلی بابالریم!
شوکتینگیز، شکوهینگیز و بویوکلیگینگیز اوصافینی یالغیزگینه کتابلر اوراغیدن انگلمهدیک، بلکه قالدیرگن قیمتلی میراثینگیز بو بارهده شهادت بېریب تورماقده. کاشغر مدنیتی، قارهخانيلر، خوارزميلر، سلجوقيلر، عثمانيلر، غزنويلر، اېلخانيلر، تېموريلر، بابريلر، صفويلر، شیبانيلر، هشترخانيلر… نینگ میراثی و اولرنینگ قدرتینی هر دایم اېسگه سالووچی تاریخي آبدهلر و یادگارلیکلر بیرمه-بیر عظمتینگیزنی یادلب تورهدی.
زمینیمیز سیز کبی غرورلی سلطانلر، صلابتلی حکمالر و فضلالرگه اۉز بغریدن جای بېرگنینی یخشی بیلهمیز. تاغ و تاشلر، سیزنینگ دَدیل آت چاپیب، اېرکینلیک و ظلمگه قرشی قیلیچ کۉتریب دشمن اوستیگه نې-نې بلالرنی یاغدیرگنینگیز اوچون گواهلیک بېرهدی. قدرتی ایله دنیانینگ کتّه قسمیگه حکم سورگن شکوهلی پادشاهلر سیزنینگ غیرتینگیز، شهامتینگیز و اېلپرور و وطنسېورلیگینگیزدن حیرت برماغینی تیشلب، سیز ایله کورهش میدانیگه چیققنده شجاعتینگیز آلدیده تیز چۉکیب، بۉیسونیشلریدن اۉزگه چاره تاپهآلمهگنلرینی کۉپ باره اۉقیگنمیز، اېشیتگنمیز.
بیراق، اې اولوغ اجدادیم و اې بویوک بابالریم!
نېگهدیر ایچیمنی یامان بیر تویغو چولغهماقده. بو حس اۉز خنجرینی مېن اوچون یلنگلب، قَیرهب، مېنی کۉندیریشگه توتینماقده. تیلیم سۉزگه بارمهیدی بعضاً. حقیقتنی اۉزینگیز اَیتینگ، اولوغ بابالریم! تاریخ یالغان سۉزلر اېدیمی؟ قالگن شو میراثلر بَریسی سیزنیکی اېمسمی؟ شجاعتده شهرتینگیز چی؟… یاکه بیز یخشی اولاد بۉلالمهدیکمی؟
سۉزلریمدن خفه بۉلمهنگیز اې مېنینگ کۉکرهگی تاغ بابالریم! یورهگیم دردینی سۉیلهیاتیرمېن. قنی اېدی حالیمیزنی کېلیب کۉرسنگیز!
بیز، اولوغ بابالریمیزنینگ قوتلوق قانلری وجودیمیزده قَینهیدی، -دېیه ادعا اېتهمیز. بیز اولوغ خانلر اولادی اېکنمیز، نېگه بوندهیین احوالدهمیز؟ قچانگهچه ظلم و قرهملیک یوکی ایله بۉینیمیز بوکیلیب یورسین؟
بعضی وقتلر، توشکونلیک غباری آستیدن باش کۉتریب، امید چراغینی یورهگیمده یاقهمن:
تورک عالمی بیر قۉل بۉلهجکمی؟ باشیمیزنی قاپلب تورگن قارانغی تونلریمیز بیر کون کېلیب، شاید، تانگ آتهجکدیر. آرتده قالگن عظمت و بویوکلیککه قیتهدن اېگه بۉلیش تویغوسی، بلکه شعوری خلقیمیز آنگیده ینه جانلهنر. بیزگه بیر اویغانیش کېرهکدیر فقط، بیر اویغانیش!
اې نامی اولوغ و غیرتی یېر تیترهتگن اېرهن بابالریم!
روحینگیز بیزنی عالي مقصد سَری یۉللب تورسین.
عدالتسیزلیک و ظلمگه قرشی کورهشیش اوچون بیزگه عقل، بیلیم و کوچ بۉلسین.
حُر یشهماق و حق آلیش اوچون اۉز قانیمیزنی تنیب، تاریخیمیزگه قیتهیلیک.
امید یالقینی یورهکلرده سۉنمهی یشنهسین.
بیر قۉل، بیر یۉل، بیر تیل و بیر دل بۉلیب یشهیلیک. تورک عالمی فقطگینه تاریخنینگ صحیفهلریده قالمهسین – یشهسین، نفس آلسین، بیرلشسین!
