ایران و امریکا جمهور رییسلری اۉرتهسیده کېلیشوو امضالنگنیگه اتیگی۱۰ کون بۉلگن بیر پیتده، هر ایکّی دولت حربي کوچلری فارس کۉرفزیده بیر-بیری نینگ موضعلریگه قرشی ینگی هجوملر اویوشتیریلگنینی معلوم قیلدی.
بوگون (شنبه،۶-سرطان) تانگده ایران اسلام انقلابی قۉریقچیلری امریکانینگ منطقهدهگی حربي مرکزلریگه ضربه بېرگنینی اعلان قیلدی.
سپاه دېنگیز کوچلری بیاناتیده ایتیلیشیچه، امریکانینگ ایراننینگ ساحل حدودلریگه اویوشتیرگن هوا هجوملری همده اسرایل نینگ لبنان جَنوبیده صلحنی بوزگنیگه جوابن امریکانینگ منطقهدهگی حربي موضعلری نشانگه آلینگن.
بوگون تانگده ایرنا اخبارات آژانسی جمعه کېچهسی ساعت تخمیناً۱۱:۳۰ده ایران نینگ هرمزگان ولایتی جَنوبیدهگی سِریک آرالی نینگ طاهرویی بندرگاهی حدودیده پارتلش آوازی اېشیتیلگنی حقیده خبر بېردی.
شو بیلن بیرگه، امریکا قوراللی کوچلری مرکزي قوماندانلیگی (سنتکام) ایرانگه قرشی ینگی هجومنی تصدیقلهدی.
سنتکام بیاناتیگه کۉره، جمعه کېچهسی ایران نینگ هرمز بۉغازیده تجارت کېمهسیگه قیلگن هجومیگه جوابن ایراندهگی نشانلرگه ضربهلر بېریلگن.
قوماندانلیکنینگ معلوم قیلیشیچه، امریکا اوچاقلری ایراننینگ «راکت و درون انبارلری همده قیرغاق رادار تیزیملری»نی نشانگه آلگن.
بیاناتده قید اېتیلیشیچه، ایران پنجشنبه کونی (۴-سرطان) هرمز بۉغازیده عمان ساحلی بۉیلب سوزیب کېتهیاتگن سینگاپور بیراغی آستیدهگی تجارت کېمهسینی خودکوش درون بیلن اورگن.
امریکا جمهور رییسی دونالد ترامپ کېچه کېچقورون بو حرکتنی «اۉت آچیشنی تۉختهتیش تۉغریسیدهگی کېلیشوو نینگ احماقانه بوزیلیشی» دېب اتهگن اېدی.
اېسلهتیب اۉتمیز، ایران و امریکا اۉرتهسیده اوروشنی بوتونلهی یکونلش همده هرمز بۉغازینی قَیته آچیشگه قرهتیلگن کېلیشوو چهارشنبه کونی (۲۸-جوزا) مسعود پزشکيان و دونالد ترامپ تامانیدن امضالنگن.
اۉتگن جمعه (۳۰-جوزا) اېسه سویسده ایران و امریکا هیئتلری، شونینگدېک پاکستان و قطر باش وزیرلری اشتراکیده یکوني کېلیشوو بۉییچه مذاکرهلر نینگ بیرینچی باسقیچی اۉتکزیلگن.
ینگی هجوملر ایران و امریکا تامانیدن توزیلگن تۉرتته علیحده ایشچی گروه یکوني کېلیشوو نینگ تخنیکي مسألهلری همده کېلیشوو بندلرینی عملگه آشیریش اوستیده ایش آلیب بارهیاتگن بیر پیتده صادر بۉلماقده.
