ایران تشقی ایشلر وزیرلیگی امریکانینگ مملکت جَنوبي ساحللریدهگی نشانلرگه اویوشتیرگن ینگی هجوملرینی بیرلشگن ملتلر تشکیلاتی نظامی نینگ آچیقدن-آچیق بوزیلیشی همده اوروشنی یکونلش تۉغریسیدهگی کېلیشوونینگ قۉپال روشده بوزیلیشی دېب بهالهدی.
وزیرلیک بوگون (شنبه، ۶-سرطان) اعلان قیلگن بیاناتیده اوشبو هجوملرنی قارهلب، «ایران اسلام جمهوریتی مملکت حاکمیتی، خوفسیزلیگی و ملي منفعتلرینی برچه امکانیتلری بیلن حمایه قیلهدی»، دېیه تأکیدلهدی.
بیاناتده ینه قید اېتیلیشیچه، «ایران اسلام جمهوریتی قوراللی کوچلری نینگ امریکا باسقینچی کوچلریگه علاقهدار نشانلرگه بېرگن مدافعه ضربهلری عیناً شو اساسده عملگه آشیریلدی».
وزیرلیک نینگ بیلدیریشیچه، «اوشبو وضعیت عاقبتلری اوچون برچه مسوولیت تجاوزکار و اۉز وعدهسینی بوزگن امریکا ذمّهسیگه همده امریکانینگ ایرانگه قرشی تجاوزکار حرکتلریگه هر قندهی شکلده شریکلیک قیلگن تامانلر ذمّهسیگه یوکلنهدی».
ایران تشقی ایشلر وزیرلیگی فارس کۉرفزی نینگ جَنوبي ساحلیدهگی برچه دولتلرنی یخشی قۉشنیچیلیک تمایلیگه عمل قیلیشگه همده اۉز حدودی و زیرساختلریدن ایرانگه قرشی تجاوزکار حرکتلر اوچون فایدهلنیشگه یۉل قۉیمسلیک بۉییچه خلقارا حقوق نینگ اساسي تمایلیگه رعایه اېتیشگه چقیردی.
تیناوون کېچقورون امریکا مرکزي قوماندانلیگی (سنتکام) بیانات بېریب، اېران نینگ تجارت کېمهسیگه هجومیدن سۉنگ «ایران نینگ راکت و درون انبارلری همده قیرغاق رادار تیزیملری»گه ضربهلر بېرگنینی معلوم قیلدی.
شوندن سۉنگ ایران اسلام انقلابی قۉریقچیلری دېنگیز کوچلری امریکانینگ ایران ساحل حدودلریگه بېرگن هوا ضربهلری و اسرایل نینگ لبنان جَنوبیده صلحنی بوزگنیگه جوابن امریکا نینگ منطقهدهگی حربي مرکزلرینی نشانگه آلگنینی بیلدیردی.
بو جاري ییل نینگ ۲۸-جوزا کونی ایران و امریکا اۉرتهسیده اوروشنی یکونلش بۉییچه کېلیشوو امضالنیب، اوندن کېین اونی عملگه آشیریش یوزهسیدن بیرینچی مذاکرهلر باسقیچی اۉتکزیلگنیدن بویان ایکّی دولت اۉرتهسیدهگی ایلک اۉزارا هجوم حسابلنهدی.
مذکور کېلیشوونینگ بیرینچی بندیده تامانلر برچه جبههلرده اوروش و حربي عملیاتلرنی تۉختهتیش مجبوريتینی آلگن اېدی.
