پاکستان اوردوسینینگ معلوم قیلیشیچه، کراچی شهریدهگی حربي پوستهگه پاکستان طالبانی حرکتی (تیتیپی) تامانیدن اویوشتیریلگن هجوم عاقبتیده اوچ کیشی خوفسیزلیک خادیمی و اوچ کیشی هجومچی اۉلدیریلگن.
شونینگدېک، یرهدار حالتده قۉلگه آلینگن هجومچیلردن بیری تیتیپیگه اعضا بۉلگن افغانستان وطنداشی اېکنی اَیتیلگن.
دان گزېتهسی پاکستان اوردوسی جماعتچیلیک بیلن علاقهلر ادارهسیگه تیهنیب، بوگون (یکشنبه، ۷ سرطان) هجوم تیناوون کېچقورون ساعت ۷:۰۰–۷:۳۰ آرهلیغیده یوز بېرگنینی معلوم قیلیشگن.
خبرگه کۉره، هجوم اوچون جوابگرلیکنی تیتیپینینگ قوراللی قناتلریدن بیری بۉلگن «جماعت اولاحرار» اۉز ذمّهسیگه آلگن.
پاکستان اوردوسینینگ بیلدیریشیچه، هجوم عاقبتیده جمعی یېتّی کیشی، جملهدن اوچ نفر هجومچی و تۉرت نفر خوفسیزلیک خادیمی هلاک بۉلگن. ینه بېش کیشی، جملهدن تۉرت حربي و بیر کیشی هجومچی یرهلنگن.
اوردونینگ بیاناتیده اَیتیلیشیچه، یرهدار حالده قۉلگه آلینگن تۉرتینچی هجومچی تیتیپی اعضاسی بۉلگن افغانستان وطنداشی دیر.
پاکستان اوردوسی معلوماتیگه کۉره، هجومچیلر آلدین پارتلاوچی مادّهلر آرتیلگن موترنی «سند رنجرز» یا «تکاوران سند» حربي بازهسینینگ کیریش قِسمیگه اوریب پارتلهتگن، شوندن سۉنگ اۉق اوزیشنی باشلهگن.
بیاناتده شوندهی دېییلهدی: «بیراق اولرنینگ یاووز رېجهلری «سند رنجرز» کوچلرینینگ هوشیار و قطعي جوابی بیلن بوتونلهی برباد قیلیندی.
اوچ نفر خارجي (خوارج) جنگری یۉق قیلیندی، ینه بیری اېسه افغانستان فقراسی یرهدار حالده قۉلگه آلیندی.»
پاکستان حکومتی تیتیپی جنگریلرینی «خوارج» دېب اتهیدی.
سۉنگگی ایکّی آی ایچیده خیبر پختونخوا ایالتیده تیتیپی، بلوچستان ایالتیده اېسه بلوچستان آزادلیک اوردوسی هجوملرینینگ کوچهییشی آرتیدن پاکستاندهگی خوفسیزلیک وضعیتی سېزیلرلی درجهده یامانلشدی.
پاکستان اوردوسی معلوماتیگه کۉره، مملکتده اپرېل آییده ۱۰۱ ته، می آییده اېسه ۱۲۸ ته قوراللی هجوم قید اېتیلگن. اوشبو هجوملرنینگ اکثریتی محلي پولیس و فدرال اوردو حربي پوستهلرینی نشانگه آلگن.
