امریکا مرکزي قوماندانلیگی (سنتکام) کېچه تونده ایران حدودیدهگی۹۰ته حربي نشانگه هجوم اویوشتیرگنینی معلوم قیلدی.
سنتکام بوگون (پنجشنبه، ۱۸سرطان) نشر قیلگن بیاناتیده، تونگی هجوملر ایراننینگ هرمز بۉغازیده تجارت کېمهلری و تینچ اهالی دېنگیزچیلریگه هجوم قیلیش صلاحیتینی ضعیفلشتیریشگه قرهتیلگنینی بیلدیردی.
قوماندانلیککه کۉره، هجوملرده ایران نینگ هوا مدافعه تیزیملری، ساحل کوزهتوو اسکونهلری، راکت و درون انبارلری، دېنگیزدهگی حربي صلاحیتی همده ایران قیرغاق چیزیغی بۉیلب جایلشگن حربي لاگیستیکه آستقورمهلری نشانگه آلینگن.
کېچه تونده ایران عامهوي اخبارات واسطهلری امریکا حربي اوچاقلری پروازلری بیلن بیر وقتده بندر عباس، چابهار و کنارک شهرلریده بیر نېچته پارتلشلر صادر بۉلگنینی خبر قیلگن اېدی.
امریکانینگ ینگی هجوملری عاقبتیده یوزهگه کېلگن انساني تلفاتلر حقیده حاضرچه رسمي معلومات یۉق.
امریکا اوردوسی چهارشنبه آقشامیده کېتمه-کېت ایکّینچی تون جَنوبي ایرانگه کېنگ کۉلملی هجوم اویوشتیردی.
سهشنبه آقشامیده هم امریکا کوچلری جَنوبي ایراندهگی 80 ته نقطهگه، جملهدن بندر عباس و سیریک هرمزگان حدودلریگه ضربه بېرگن اېدی. شوندن سۉنگ ایران اسلام انقلابی قۉریقچیلری و مملکت اوردوسی کویت همده بحریندهگی امریکا حربي بزهلریگه 85 ته درون و راکت اوچیریلگنینی معلوم قیلگن.
