پاکستان باش وزیری شهباز شریف مملکتنینگ سیاسي و حربي رهبریتی تروریزمنی بوتونلهی یۉق قیلیش مسألهسیده یکدل اېکنینی ایتدی. او، شونینگدېک، هندستان قۉللب-قوّتلهیاتگن ترورچی گروهلر افغانستانده باشپناه تاپهیاتگنینی دعوا قیلدی.
اکسپرس تریبون نشری خبریگه کۉره، شهباز شریف اوشبو بیاناتنی بوگون (پنجشنبه، ۱۸سرطان) بلوچستان ولایتی مرکزی کوېته شهریده بۉلیب اۉتگن ییغیلیشده بیلدیرگن. اونده پاکستان اوردوسی قوماندانی عاصم منیر هم اشتراک اېتگن.
شریف شوندهی دېدی: «مملکت نینگ سیاسي و حربي رهبریتی تروریزمنی یۉق قیلیش قراریده تۉلیق بیردم. خوفسیزلیککه تهدید سالهیاتگن سۉنگگی ترورچی یۉق قیلینمهگونچه بو کورهش دوام اېتهدی.»
اونینگ تأکیدلشیچه، پاکستان ترورچی گروهلرنی مغلوب اېتیش و مملکتنی ترقیات همده فراوانلیک یۉلیگه قَیتریش اوچون برچه منبعلر و امکانیتلرینی سفربر اېتهدی.
شهباز شریف ینه پاکستان نینگ «شرقي قۉشنیسی»، یعنی هندستاننی تروریزمنی قۉللب-قوّتلشده عیبلب، دهلی ترورچی گروهلرگه قورال-یراغ، مالیوي مبلغ و باشقه واسطهلرنی یېتکزیب بېرهیاتگنینی دعوا قیلدی.
اونینگ سۉزلریگه کۉره، بو گروهلر افغانستانده باشپناه تاپیب، کېینچهلیک خیبر پختونخوا و بلوچستان ایالتلریده هجوملر اویوشتیرماقده. شریف پاکستان حکومتی اولر نینگ رېجهلری برباد قیلینیشینی تأکیدلهدی.
پاکستان باش وزیری ینه شوندهی دېدی: «بو ترورچیلر، بو فتنه الخوارج، اۉتگن ییل می آییدهگی تۉرت کونلیک اوروشدهگی موفقیت و سۉنگگی دیپلوماتیک یوتوقلردن کېین پاکستان نینگ خلقارا آبروسیگه پوتور یېتکزماقچی.»
اونینگ ایتیشیچه، سۉنگّی حربي عملیاتده 54 نفر «ترورچی» اۉلدیریلگن.
پاکستان یېتکرمهلری معلوماتلریگه کۉره، بلوچستاندهگی سۉنگّی اوچته هجوم عاقبتیده خوفسیزلیک کوچلری خادملری و تینچ اهالی وکیللرینی اۉز ایچیگه آلگن۴۲ کیشی هلاک بۉلگن.
پاکستان رسميلری آلدین هم بیر نېچه بار پاکستانلیک قوراللی گروهلر افغانستان حدودیدن فایدهلنیب، پاکستان ایچیده هجوملر اویوشتیرهیاتگنینی دعوا قیلگن. پاکستان اوردوسی هم بو گروهلرنی یۉق قیلیش مقصدیده افغانستان حدودیدهگی نشانلرگه بیر نېچه بار هوا ضربهلری بېرگن.
سۉنگّی حالتده،۱۰ کون آلدین پاکستان اوردوسی پکتيا، خوست و کنر ولایتلریدهگی حدودلرنی بامباردمان قیلگن. نتیجهده اۉنلب تینچ اهالی هلاک بۉلگن و یرهلنگن.
پاکستان بو هجوملرده۲۵ نفر پاکستانلیک جنگری اۉلدیریلگنینی بیلدیرگن، بیراق طالبان ضربهلرده تینچ اهالی نشانگه آلینگنینی ایتگن.
بیرلشگن ملتلر تشکیلاتی هم پاکستان هجوملری عاقبتیده۲۸ نفر تینچ اهالی هلاک بۉلگنی و ینه۴۹ کیشی یرهلنگنینی تصدیقلهگن.
