ایران رهبری مجتبی خامنهای آتهسی علی خامنهاینینگ دفن مراسمیده اشتراک اېتگنلرگه منّتدارلیک بیلدیریب، اونینگ قانی اوچون قصاص آلینیشی مقررلیگینی تأکیدلهدی.
بوگون (شنبه، ۲۰-سرطان) نشر قیلینگن یازمه پیامده علی خامنهایگه مراجعت قیلینیب، شوندهی دېییلهدی: «سیزنینگ پاک قانینگیز و اوشبو ایکّی اوروشده شهید بۉلگن برچه انسانلرنینگ قانی اوچون جنایتچی و شرمندهلی قاتللردن قصاص آلیشگه عهد قیلهمیز. بو قصاص خلقیمیزنینگ طلبیدیر و البته عملگه آشیریلهدی.»
ایراننینگ سابق عالي رهبری علی خامنهای اۉتگن ییل نینگ 9-حوت کونی امریکا و اسرایلنینگ ایرانگه اویوشتیرگن هجوملرینینگ ایلک تۉلقینیده عایله اعضالرینینگ بیر قِسمی بیلن بیرگه اۉلدیریلگن اېدی. او تیناوون تانگده مشهددهگی امام رضا زیارتگاهیده دفن اېتیلدی.
اونینگ اۉغلی و وارثی مجتبی خامنهای ینگی مراجعتیده امریکا و اسرایل رهبرلریگه اشاره قیلیب، شوندهی دېدی: «بو جنایتچیلر اولرنینگ برچهسی رۉیخطگه آلینگن آسایشته اۉلیمنی آرزو قیلگن حالده قبرگه کیرهدی.»
او ینه شوندهی قۉشیمچه قیلدی: «اولر بیلیشلری کېرهککی، بو ایش مېنینگ یاکه باشقه مسووللرنینگ موجودلیگیگه باغلیق اېمس. بیز بۉلهیلیک یاکه بۉلمهیلیک، بو مقصد عملگه آشهدی و یقین آرهده دنیانینگ تورلی بورچکلریدهگی آزادلیکپرور انسانلر اوشبو الهي وظیفهنینگ بیر قِسمینی بجرهدیلر.»
علی خامنهای اۉلدیریلگندن سۉنگ ایران نخبهلر کېنگشی اونینگ اۉغلی مجتبی خامنهای نی ینگی رهبر اېتیب تعیینلهگن اېدی. بیراق او اۉشندن بویان جماعتچیلیک آلدیده کۉرینمهگن و ایران عامهوي اخبارات واسطهلری فقط اونگه نسبت بېریلگن بیاناتلرنی نشر قیلیب کېلماقده.
مجتبی خامنهای حتی آتهسی و باشقه عایله اعضالرینینگ دفن مراسمیده هم کۉرینمهدی. خبرلرگه کۉره، خوفسیزلیک سبب اونگه مراسمده قتنهشیشگه رخصت بېریلمهگن.
