بیرلشگن عرب امیرلیکلری امریکا و ایران اۉرتهسیدهگی اوروش دوام اېتهیاتگنیدن چوقور خواطر بیلدیریب، منطقهدهگی کېسکینلیک و بېقرارلیکنی زودلیک بیلن تۉختهتیشگه چقیردی.
امیرلیک تشقی ایشلر وزیرلیگی بوگون، یکشنبه (۲۷-سرطان) نشر قیلگن بیاناتیده تامانلرنی خوفلی عاقبتلرنینگ آلدینی آلیش و منطقهده زۉروانلیک همده بېقرارلیکنینگ ینگی باسقیچیگه یۉل قۉیمسلیک اوچون ماکسیمال درجهده وزمینلیک کۉرسهتیشگه چقیردی.
بیاناتده حربي حرکتلرنی درحال تۉختهتیش و ماجرا تامانلرینی مذاکرهلر چوکیسیگه قَیتیشگه دعوت اېتیلگن.
بیرلشگن عرب امیرلیکلری تشقی ایشلر وزیرلیگی هرمز بۉغازی آرقهلی خوفسیز و اوزلوکسیز کېمهلر قتناوینی تأمینلش ضرورلیگینی تأکیدلب، بونی جهان اقتصادیاتی اوچون حیاتي اهمیتگه اېگه اېکنینی قید اېتدی.
بیرلشگن عرب امیرلیگی منطقهدهگی تینچ اهالی، آستقورمهلر و ملکی انشااتلر، جملهدن مکتبلر، بیلیم یورتلری، شفاخانهلر، سوونی توزسیزلنتیریش (فابریکه)لری، انرژی انشااتلری، ترانسپورت مرکزلری و تورر جایلرنی نشانگه آلیشنی خلق ارا حقوق تمایللری همده نارملری نینگ آچیق و جدّي بوزیلیشی دېب بهالهدی.
شونینگدېک، بوندهی حرکتلر هېچ قندهی شرایطده قبول قیلینیشی یاکه آقلنیشی ممکن اېمسلیگی تأکیدلندی.
امریکا قۉشمه ایالتلری و ایران اۉرتهسیدهگی ینگی قوراللی تۉقنهشوولر اۉتگن هفته یکشنبه تانگیده باشلنگن بۉلیب، حاضرگچه کېتمه-کېت سکّیزینچی کون دوام اېتماقده.
بو دورده امریکا ایران حدودیدهگی اۉندن آرتیق کۉپریک، تېمیر یۉلنینگ بیر نېچه نقطهسی، سوونی توزسیزلنتیریش (فابریکه) و برق ستشنلریگه ضربه بېرگن.
ایران اېسه کویت و بحریندهگی هجوملرده سوونی توزسیزلنتیریش انشااتلری همده علاقه کۉپریکلری نشانگه آلینگنینی تن آلگن.
