سعوديه عربستانی تشقی ایشلر وزیرلیگی مملکت ولیعهدی محمد بن سَلمان امریکا قۉشمه ایالتلری جمهور رییسی دونالد ترامپ بیلن تیلفون آرقهلی ملاقات قیلیب، منطقهدهگی کېسکینلیکنی کمهیتیریشگه چقیرگنینی تصدیقلهدی.
وزیرلیک بوگون (یکشنبه، ۱۱-اسد) نشر قیلگن بیاناتیده، محمد بن سَلمان ترامپ بیلن صحبتده کېسکینلیکنی کمهیتیریش اوچون ملاقاتنی اوستوار یۉل صفتیده کۉریش و منطقهده آسایشتهلیکنی تأمینلش اوچون برچه سعی-حرکتلرنی ایشگه سالیش ضرورلیگینی تأکیدلهگنینی بیلدیردی.
بوندن آلدین آکسیوس نشری محمد بن سَلمان ترامپدن ایرانگه قرشی ینه-ده کېنگ کۉلملی هجوملرنی عملگه آشیرمسلیکنی سۉرهگنی حقیده خبر بېرگن اېدی.
دونالد ترامپ بوگون تانگده ایرانگه قرشی رېجهلشتیریلگن کېنگ کۉلملی هجوملر تهران و منطقهدهگی اَیریم دولتلر التماسیگه بناءً همده تېز آرهده کېلیشووگه اېریشیش شرطی بیلن بېکار قیلینگنینی معلوم قیلگن اېدی.
امریکا جمهور رییسی بو حقدهگی اجتماعي ترماقدهگی خبریده منطقه دولتلری رهبرلریدن هېچ بیرینینگ نامینی تیلگه آلمهدی.
سعوديه عربستانی تشقی ایشلر وزیرلیگی بیاناتیده شوندهی دېییلهدی:
«سعوديه عربستانی ولیعهدی کېسکینلیکنی کمهیتیریش اوچون ملاقاتنی اوستوار یۉنهلیش صفتیده بېلگیلش ضرورلیگینی تأکیدلهدی. شونینگدېک، دیپلوماتیک یېچیملر اوچون زمین یرهتهدیگن، منطقه خوفسیزلیگی و برقرارلیگینی سقلهیدیگن همده ماجرانینگ کېنگهییب کېتیشینینگ آلدینی آلهدیگن آسایشتهلیکنی تأمینلش اوچون برچه امکانیتلردن فایدهلنیش مهملیگینی اېسلهتدی. چونکه ماجرانینگ کېنگهییشی منطقوي و خلقارا خوفسیزلیک همده برقرارلیککه سلبي تأثیر کۉرسهتهدی.»
وزیرلیکنینگ قۉشیمچه قیلیشیچه، تامانلر موجود همکارلیک یۉنهلیشلری همده اولرنی ینه-ده مستحکملش و کېنگهیتیریش یۉللرینی هم محاکمه قیلگن.
بو واقعهلر امریکانینگ ایرانگه قرشی ینگی هجوملری باشلنگنیدن سۉنگ، ایراننی قۉللب-قوّتلاوچی عراق قوراللی گروهلری سعوديه عربستانیگه بیر نېچه بار درون هجوملری اویوشتیرگن بیر پیتده یوز بېرماقده.
شونینگدېک، سعوديه عربستانی بیلن ایران قۉللب-قوّتلهیدیگن یمندهگی حوثيلر حرکتی اۉرتهسیدهگی کېسکینلیک هم کوچهیگن. حوثيلر سعوديه عربستانیگه قرشی دېنگیز قملینی اعلان قیلگن همده سعوديه حکومتی بیلن باغلیق اَیریم کېمهلرگه هجوم اویوشتیرگن.
.
