امریکا جمهور رییسی دونالد ترامپ امریکا و ایران اۉرتهسیدهگی مذاکرهلرنی ایجابي بهالب، هرمز بۉغازی یقین کونلرده قَیته آچیلیشینی ایتدی.
ترامپ فاکسنیوزگه بېرگن صحبتیده: «اولر (ایران) کون بۉیی مذاکره آلیب باردیلر. وضعیت جوده یخشی کېتهیاتگنگه اۉخشهیدی»، دېدی.
او ینه شوندهی قۉشیمچه قیلدی: «هرمز بۉغازی تېز آرهده آچیلهدی. اگر اولر ینه کېلیشوودن چېکینسه، جوده قتّيق ضربهگه دوچ کېلهدیلر.»
ترامپنینگ بو بیاناتیدن سۉنگ نفت نرخی پهسهیدی، آسیا فوند بازارلری اېسه چهارشنبه کونی اۉسیش بیلن سودانی دوام اېتتیردی.
آکسیوس نشری ایکّی منطقوي منبع و امریکا رسميلریدن بیریگه تهیهنیب خبر بېریشیچه، امریکا و ایران عمان واسطهچیلیگیده هرمز بۉغازینی قَیته آچیش بۉییچه وقتینچهلیک کېلیشووگه اېریشیشگه یقینلشگن. عمان هرمز بۉغازینینگ بیر قِسمینی نظارت قیلهدی.
خبرگه کۉره، واشنگتن اوشبو وقتینچهلیک کېلیشوو چهارشنبه کونی اعلان قیلینیشیگه امید قیلماقده.
بیراق ایران دولت یېتکرمهلری خبردار منبعگه تهیهنیب معلوم قیلیشیچه، دنیادهگی نفت و سویولتیریلگن طبيعي گاز اېکسپورتی نینگ قریب بېشدن بیر قِسمی اۉتهدیگن هرمز بۉغازی بۉییچه عمان بیلن توزیلیشی رېجهلشتیریلگن کېلیشوو، امریکا ایراننی تهدید قیلیشده دوام اېتر اېکن، کېینگه قالدیریلهدی.
