ایران تشقی ایشلر وزیرلیگی سۉزلاوچیسی اسماعیل بقایی ایران و عمان اۉرتهسیده هرمز بۉغازینی باشقریش بۉییچه مذاکرهلر دوام اېتهیاتگنینی معلوم قیلدی. اونینگ ایتیشیچه، «اگر اَیریم اوچینچی تامانلر بو جریانگه تۉسقینلیک قیلمسه، ایکّی دولت نینگ اساسي کېلیشوولری و مهم مسألهلرینی اۉز ایچیگه آلگن قۉشمه بیاناتی یکوني کۉریب چیقیش و تیارلش باسقیچیده توریبدی.»
بقایی بوگون (چهارشنبه، ۱۴ اسد) شونینگدېک شوندهی دېدی: «هرمز بۉغازینینگ یاپیلیشی امریکا و اسرایل رېجیمنینگ ایرانگه قرشی حربي تجاوزی همده اونینگ بوتون منطقه خوفسیزلیگیگه تأثیری عاقبتیده یوز بېردی. شو باعث ایران و عمان اۉرتهسیدهگی کېلیشوونینگ اۉزی بۉغازنینگ ترانزیت کېمهلری اوچون تۉلیق خوفسیز بۉلیشینی انگلهتمهیدی.»
اونینگ قۉشیمچه قیلیشیچه، اقش تامانیدن یوزهگه کېلتیریلگن خوفسیزلیک تهدیدلری، خصوصاً ایرانگه قرشی دېنگیز قملی، باشقه تجاوزکار حرکتلر و تهدیدلر هنوز دوام اېتماقده.
بقایینینگ ایتیشیچه، هرمز بۉغازی ساحلیدهگی ایکّی دولت صفتیده ایران و عمان اۉرتهسیدهگی مذاکرهلر سۉنگگی ایکّی آی دوامیده تجارت کېمهلری اوچون خوفسیز دېنگیز یۉلهگینی بېلگیلش مقصدیده آلیب باریلگن. ایران نینگ وکالتلی ادارهلری اېسه اوشبو مسألهنینگ تخنیکي، حقوقي، خوفسیزلیک و اېکالاگیک جهتلرینی باتفصیل اۉرگنیب چیققن.
او ینه شوندهی دېدی: «تامانلر کۉزده توتیلگن دېنگیز یۉلهگی نینگ جیوگرافیک کوردیناتلری بۉییچه کېلیشووگه اېریشگن. اگر اَیریم اوچینچی تامانلر تۉسقینلیک قیلمسه، ایکّی دولتنینگ اساسي کېلیشوولرینی اۉز ایچیگه آلگن قۉشمه بیانات هم یکوني کۉریب چیقیش و تیارلش باسقیچیدهدیر.»
کېچه امریکا مالیه وزیری اسکات بسنت ایران بیلن هرمز بۉغازینی قَیته آچیش بۉییچه کېلیشوو بوگون یاکه اېرتهگه امضالنیشی ممکنلیگینی ایتگن اېدی.
سیانبیسی تلویزیون ترماغیگه بیرگن صحبتیده شوندی دېگن اېدی: «بیز ایرانلیکلر بیلن مذاکره آلیب باریهپمیز. بوگون یاکه اېرتهگه بۉغازنی قَیته آچیش و ماجرانی عادتي حالتگه قَیتریشگه خدمت قیلهدیگن کېلیشووگه اېریشیش احتمالی موجود.»
ایران امریکا بیلن ماجرا ینه اوج آلگنیدن سۉنگ، هرمز بۉغازینی تجارت کېمهلری و نفت تانکرلری نینگ حرکتی اوچون ینه یاپدی همده بیر نېچه کېمهگه هجوم قیلدی.
مذکور خلقارا دېنگیز یۉلی نینگ یاپیلیشی عاقبتیده بوتون دنیاده نفت نرخلری آشدی و گلوبل انرژی بحرانی یوزهسیدن کېنگ کۉلملی خواطرلرنی کوچهیتیردی.
