مصرلیک مسلمان داکتر عبدال سید امریکانینگ میشیگان ایالتیده دیموکراتیک حزب نینگ سنا مجلسی اوچون اۉتکزیلگن دستلبکی سیلاویده غلبه قازاندی.
رویترز خبریگه کۉره، عبدال سیدنینگ غلبهسی کوزگی سیلاولر آلدیدن مهم سیاسي رقابتگه یۉل آچدی. اوشبو سیلاو آچیقچهسیگه پراگرسسیو قرهشدهگی نامزاد سیاسي جهتدن بۉلینگن و کېسکین رقابتلی ایالتده غلبه قازانه آلهدیمی-یۉقمی، شونی کۉرسهتیشی ممکن. نتیجهلر امریکا سناسی اوستیدن نظارتگه هم تأثیر قیلیشی احتمال.
41 یاشلی عبدال سید سیلاوآلدی کمپاینیده ساغلیقنی سقلش، اقتصاد همده اسرایلگه شرطسیز حربي یاردمنی تۉختهتیش کبی مسألهلرگه قرهتگن.
او 2024-ییلگی جمهور رییسلیک سیلاویده جمهوریتچی دونهلد ترامپ غالب چیققن میشیگان ایالتیدهگی ایلک نامزاد حسابلنهدی.
عبدال سید نوامبر آییده بۉلیب اۉتهدیگن آرهلیق سیلاولرده کانگرسنینگ سابق جمهوریتچی اعضاسی میک راجېرس بیلن بېللشهدی.
دیموکراتیک حزبی سیلاولر دوامیده عبدال سید و اونینگ معتدل قرهشدهگی رقیبی هیلی استیونز طرفدارلری اۉرتهسیده یوزهگه کېلگن کېلیشماوچیلیکلردن سۉنگ، چهارشنبه کونی حزب بیرلیگینی مستحکملشگه حرکت قیلدی.
اوّل هیلی استیونزنی قۉللب-قوّتلهگن سنادهگی دیموکراتلر آزچیلیک یېتکچیسی چاک شومردیموکراتلر میک راجرسنی مغلوب اېتیش اوچون بیرلشیشینی ایتدی. هیلی استیونز هم عبدال سید نینگ غلبهسی اوچون ایشلشگه وعده بېردی.
عبدال سید شوندهی دېدی: «سیلاولر دوامیده آرهمیزده قندهی فرقلر بۉلگن بۉلسه هم، اولر بیزنی بیرلشتیرهدیگن قدریتلر آلدیده جوده کیچیکدیر.»
رویترزنینگ تأکیدلشیچه، دیموکراتلر دونالد ترامپ اۉتگن ییلی حاکمیتگه قَیتگنیدن بویان بیر نېچته سیلاولرده موفقیت قازانگن بۉلسه-ده، میشیگان پایگهسی حزب ایچیدهگی اساسي بحثنی ینه کون ترتیبیگه آلیب چیقدی. یعنی، حزب چپ قنات ناراضیلیگی و تیزیمگه قرشی کیفیتدن فایدهلنهیاتگن پراگرېسسیو نامزادلرنی قۉللشی کېرهکمی یاکه مستقل و ایکّیلنهیاتگن سیلاوچیلرنی کۉپراق جلب قیله آلهدیگن معتدل نامزادلرگه تهیهنیشی کېرهکمی، دېگن مسأله ینه دالضرب بۉلیب قالماقده.
