اۉرته شرقدهگی کېسکینلیکلر کوچهییب بارهیاتگن بیر پیتده، سعوديه عربستانی، تورکيه و پاکستان هر قندهی تجاوزکار حرکتلرگه قرشی جماعهوي تيیب توریش صلاحیتینی مستحکملش مقصدیده قۉشمه مدافعه بیتیمینی امضالهدی.
سعوديه عربستانی تشقی ایشلر وزیرلیگی اعلان قیلگن قۉشمه بیاناتگه کۉره، سهعوديه ولیعهد شهزادهسی محمد بن سَلمان، تورکيه جمهور رییسی رجب طیب اوردغان و پاکستان باش وزیری شهباز شریف اوشبو بیتیمنی بوگون (جمعه، ۱۶-اسد) مککه شهریده امضالهگن.
بیاناتده ایتیلیشیچه، «مذکور بیتیم هر قندهی تجاوزکار حرکتلرگه قرشی جماعهوي تيیب توریش صلاحیتینی کوچهیتیریش مقصدیده توزیلگن بۉلیب، اوچ دولتدن بیریگه قرشی عملگه آشیریلگن هر قندهی قوراللی هجوم اولرنینگ برچهسیگه قرشی هجوم صفتیده بهالنهدی.»
اوچ دولت مذکور کېلیشوو آرقهلی مدافعه ساحهسیدهگی همکارلیک نینگ برچه یۉنهلیشلرینی ینهده مستحکملشگه هم کېلیشیب آلگن.
بیاناتگه کۉره، اوشبو بیتیم اوچ مملکت نینگ جماعهوي خوفسیزلیگینی ینه-ده کوچهیتیریش، شونینگدېک، منطقه و اوندن تشقریده تینچلیک، خوفسیزلیک همده برقرارلیکنی ایلگری سوریش بارهسیدهگی عمومي مجبوريتینی افادهلهیدی.
مذکور بیتیم ایران و امریکا اۉرتهسیدهگی اوروش آرتیدن منطقهدهگی کېسکینلیک کوچهیگن بیر پیتده امضالندی. ایران قۉللب-قوّتلهیدیگن عراق و یمندهگی قوراللی گروهلر سعوديه عربستانیگه بیر نېچه بار هجوم قیلگن.
شونینگدېک، ایران و امریکا اۉرتهسیدهگی اوروش باشلنگنیدن بویان ایران اسلام انقلابی قۉریقچیلری سعوديه عربستانیدهگی نشانلرگه بیر نېچه مرته ضربه بېرگنینی و بو هجوملر امریکاگه تېگیشلی پایگاه همده تاسیساتلرگه قرهتیلگنینی دعوا قیلگن.
سعوديه عربستانی بوندن اوّل هم هستوي قورالگه اېگه یگانه مسلمان دولتی بۉلگن پاکستان بیلن علیحده مدافعه بیتیمینی امضالهگن اېدی. اونگه کۉره، ایکّی دولتدن بیریگه قرشی هجوم ایکّینچیسیگه قرشی هجوم صفتیده بهالنهدی.
