عمان تشقی ایشلر وزیرلیگی هرمز بۉغازیده کېمهلرگه اویوشتیریلهیاتگن هجوملر دوام اېتهیاتگنی حقیده آگاهلنتیریش بېریب، عینِ پیتده ایران بیلن اوشبو استراتژیک سوو یۉلی نینگ کېلهجکدهگی باشقرووی بۉییچه آلیب باریلهیاتگن مذاکرهلر «ایجابي و مثبت» روحده دوام اېتهیاتگنینی معلوم قیلدی.
وزیرلیک بیاناتیده هرمز بۉغازی آرقهلی حرکتلنهیاتگن کېمهلرگه تکراري هجوملر قارهلندی، بیراق بو هجوملرده اېران نینگ نامی تیلگه آلینمهدی.
بیاناتده تأکیدلنیشیچه، هرمز بۉغازیدهگی کېمهلر قتناوینی ترتیبگه سالیش بۉییچه مذاکرهلر ایجابي و کانتروکتیف محیطده آلدینگه سیلجیماقده. عمان برچه تامانلرنی مذاکرهلر جریانیگه پوتور یېتکزیشی ممکن بۉلگن هر قندهی حرکتلردن تيیلیشگه چقیردی.
شو بیلن بیرگه، بیرلشگن عرب امیرلیکلری دولتگه قرهشلی نفت کمپنیسی نینگ بیر تانکری هرمز بۉغازیدن اۉتهیاتگنده هجومگه اوچرهگنینی معلوم قیلدی.
بیرلشگن عرب امیرلیگی تشقی ایشلر وزیرلیگی بیاناتیده «ایران نینگ ابوظبی ملي نفت کمپنیسیگه قرهشلی تانکرگه راکت بیلن اویوشتیرگن دشمنانه هجومی» قارهلندی. وزیرلیک هجوم عاقبتیده قربانلر بۉلمهگنینی بیلدیردی.
شونینگدېک، بویوک بریتانيا نینگ دېنگیز سوداسی عملیاتلری مرکزی (یوکاامتیاو) هم عمان ساحللری یقینیده، هرمز بۉغازیده بیر کېمه سنارید ضربهسیگه اوچرهب، یانغین چیققنینی معلوم قیلدی. یانغین اۉچیریلگن و حادثهده هېچ کیم جبرلنمهگن.
حاضرچه (یوکاامتیاو) قید اېتگن کېمه بیرلشگن عرب امیرلیگی تیلگه آلگن تانکر بیلن بیر خیل کېمه اېکنی یاکه یۉقلیگی انیقلنمهگن.
ابوظبی ملي نفت کمپنیسی جمعه کونی اوروش باشلنگنیدن بویان کمپنی نینگ 15 ته کېمهسی هرمز بۉغازیده هجومگه اوچرهگنی، شوندن اوچ تهسی فقط جاري هفته دوامیده نشانگه آلینگنینی بیلدیرگن اېدی.
ایران عملده هرمز بۉغازینی چېکلب، اوشبو سوو یۉلیدن اۉتووچی کېمهلردن تۉلاو طلب قیلماقده. امریکا بو چارهگه کېسکین قرشی چیقماقده.
ایران تشقی ایشلر وزیری عباس عراقچی شنبه کونی عمان بیلن آلیب باریلهیاتگن مذاکرهلر «یکوني باسقیچگه یقینلشگنی»نی ایتدی. بیراق او بو «هرمز بۉغازی قَیته آچیلهدی دېگنی اېمس»لیگینی تأکیدلهدی.
عراقچی سۉزلریگه کۉره، هرمز بۉغازی نینگ قَیته آچیلیشی باشقه شرطلر بجریلیشی و امریکا تامانیدن شرطنامه بوزیلگنی اوچون تاوان تۉلهنیشیگه باغلیق.
