عراق کردستان منطقهسی رسميلری ایراننینگ ایکّی اوچووچیسیز اوچاغی بوگون، دوشنبه کونی ( ۲۶اسد) تانگده منطقه باش وزیرینینگ ادارهسی و استخبارات خدمتی باشلیغی نینگ اویینی نشانگه آلگنینی معلوم قیلدی.
کردستان منطقهسی باش وزیری مسرور بارزانی، ایکس اجتماعي ترماغیدهگی پُستیده شوندهی دېدی: «کردستان منطقهسینینگ تروریزمگه قرشی کورهش بۉلینمهسی تامانیدن اۉتکزیلگن تېکشیروولردن سۉنگ، بوگون مېنینگ شخصي ادارهم و خوفسیزلیک و استخبارات خدمتی باشلیغینینگ اویی ایران نینگ درون هجوملریگه اوچرهگنی انیقلندی».
او قۉشیمچه قیلدی: «بو کېسکینلیک نینگ خوفلی درجهده کوچهییشی و کردستان منطقهسی نینگ خوفسیزلیگی همده برقرارلیگیگه تۉغریدن-تۉغری تهدیددیر».
کردستان منطقهسی نینگ تروریزمگه قرشی کورهش باشقرمهسی هجومده هېچ کیم هلاک بۉلمهگنی یاکه یرهلنمهگنینی معلوم قیلدی.
اوشبو باشقرمه بیاناتیده: «ایکّی دانه پارتلاوچی حدید۱۱۰ روسوملی درون ایران حدودیدن چېگرهدن اۉتیب، کردستان منطقهسی باش وزیری نینگ شخصي ادارهسی و پاراستین تشکیلاتی رهبری نینگ قرارگاهی تامان اوچیریلگن»، دېییلهدی.
یقین شرقده اوروش باشلنگنیدن بېری امریکا کوچلری، خارجي نفت کمپنیلری و ایرانگه مخالف گروهلرنی سورگونده قبول قیلیب کېلهیاتگن کردستان منطقهسی تهران و عراق ایچیدهگی ایرانگه یقین قوراللی گروهلر تامانیدن مینگ مرتهدن آرتیق هجومگه اوچرهگن.
درونلر کردستان منطقهسی نینگ پایتختی اربیل آسمانیده بیر نېچه بار توتیب قالینگن، باشقه هجوملرده اېسه ایرانگه مخالف گروهلر نینگ موضعلری و امریکا منفعتلری نشانگه آلینگن.
تهران سورگونده فعالیت یوریتهیاتگن کرد مخالف گروهلرینی غرب و اسرایل منفعتلریگه خدمت قیلیشده عیبلهیدی. ایران حتا اپرېل آییده اعلان قیلینگن و آخر-عاقبت برباد بۉلگن منطقوي صلح دوریده هم اوشبو گروهلرگه قرشی هجوملرینی دوام اېتتیرگن.
مذکور گروهلر اوروش باشلنگنیدن بېری کردستان منطقهسیدهگی بازهلری و لاگېرلری نینگ اکثریتینی ترک اېتگن.
۱۷-جولای کونی کردستان منطقهسی نینگ شرقیدهگی سلیمانيه شهری یقینیده صادر بۉلگن درون و راکت هجوملریده۹ کیشی هلاک بۉلگن.
