امریکا قۉشمه ایالتلرینینگ جمهور رییسی دونالد ترامپ، ایران اسلام جمهوریتی بیلن هېچ قندهی مذاکره یاکه ملاقات آلیب باریلمهیاتگنینی ایتدی.
او بوگون (سهشنبه، ۲۷اسد) تروث سوشالدهگی پیامیده کېلهجک اوچون هم هېچ قندهی مذاکره رېجهلشتیریلمهگنینی یازدی.
ترامپ ایراننینگ دېنگیز بلاکدهسی همان تۉلیق کوچده اېکنینی و عملگه آشیریلهیاتگنینی، هرمز بۉغازی اېسه آچیق و ایشلهیاتگنینی ایتدی. او برچه دېنگیز ماینلری ییغیب آلینگنی یاکه پارتلهتیب یوباریلگنینی هم قۉشیمچه قیلدی.
باشقه تاماندن، ایران پارلمانی رئیسی و مذاکره هیئتی رهبری محمد باقیر قالیباف سهشنبه کونی هرمز بۉغازی امریکا جون آییده ایران بیلن امضالنگن وقتینچهلیک کېلیشوو شرطلرینی بجرگونچه یاپیق قالیشینی ایتدی.
قالیباف ایران پارلمانیدهگی نطقیده بو شرطلرگه امریکا تامانیدن ایران بندرلریگه قۉییلگن بلاکدنی بېکار قیلیش، نفت چېکلاولرینی آلیب تشلش، موزلهتیب قۉییلگن ایران بایلیگینی آزاد قیلیش همده برچه جبههلرده تهدید و حربي عملیاتلرنی تۉختهتیش کیریشینی بیلدیردی.
دوشنبه کونی دونالد ترامپ نینگ کویاوی و مخصوص وکیلی جرد کوشنراېسه اۉز سۉزلریگه کۉره، هنوز دوام اېتهیاتگن مذاکرهلر بارهسیده فکر بیلدیردی.
جرد کوشنر فاکس نیوز تلویزیونیگه: «بو حقده تفصیلاتلرگه کیرا آلمهیمن، اما امریکا حکومتی بیلن ایران حکومتی نینگ تورلی بۉغینلری اۉرتهسیدهگی ملاقات برچه درجهلرده، احتمال، هر قچانگیدن هم کېنگراق اېکنینی ایتیشیم ممکن»، دېدی.
ایران نینگ یوقاری مرتبهلی رسميسی هم دوشنبه کونی رویترز خبرگزالیگیگه بېرگن بیاناتیده امریکا بیلن اوروشنی دایمي یکونلش بۉییچه مذاکرهلر تۉختهگنی سببلی ایران اۉزی نینگ حربي یاندشووینی «تۉلیق هجومکار» حالتگه اۉزگرتیریشینی ایتدی.
باشقه تاماندن، دونالد ترامپ دوشنبه کونی فاکس نیوز بیلن صحبتده ایران «تسلیم بۉلیش نینگ آق بیراغینی کۉتریشی کېرهک»لیگینی ایتدی.
