کارگر حزبی یېتکچیسی اندی برنام بوگون (دوشنبه، ۲۹-سرطان) رسماً بویوک بریتانيانینگ ینگی باش وزیری اېتیب تعیینلندی.
رویترز خبریگه کۉره، باکینگهام سرایی اندی برنام بویوک بریتانيا قیرالی چارلز سوم بیلن اوچرهشگچ، اونگه حکومت توزیش وظیفهسی یوکلهتیلگنینی معلوم قیلگن.
اندی برنام کییر استارمر اۉرنینی اېگهلهدی و سۉنگگی اۉن ییل ایچیده بویوک بریتانيا نینگ یېتّینچی باش وزیری بۉلدی.
او «داونینگ استریت»۱۰-اوی آلدیدهگی ایلک نطقیده شوندهی دېدی: «مېن حاضرگینه باکینگهام سراییدن کېلدیم. او یېرده حضرتی عاليلری قیرال نینگ حکومت توزیش حقیدهگی تکلیفینی قبول قیلدیم .»
برنام: «سۉنگگی اۉن ییل ایچیده بو کۉچهدن اۉتگن آلتینچی شخص اېکنیمنی یخشی بیلهمن. ۲۰۱۶ییلدن بویان اېسه یېتّینچی باش وزیرمن. بو لحظهنی چوقور ملاحظه و ینگی قرارلر اوچون امکانیتگه ایلنتیرهمن»، دېدی.
او بو دورنی بویوک بریتانيا اوچون «بوریلیش نقطهسی»گه ایلنتیریشینی و مملکتده سۉنگگی۴۰ ییلدهگی اېنگ کتّه اۉزگریشلرنی عملگه آشیریشینی وعده قیلدی.
اندی برنام یشش خرجتلرینی کمهیتیریش، اویسیزلیککه قرشی کورهشیش و بویوک بریتانياده برقرارلیکنی تیکلشگه وعده بېردی.
سابق باش وزیر کییر استارمر ایکّی ییل اوّل عمومي سیلاودهگی ییریک غلبهدن سۉنگ لوازمنی اېگهلهگن اېدی. بیراق اونینگ حزبی آرهلیق سیلاولرده مغلوبیتگه اوچرهگچ، کوچلی باسیم آستیده قالیب، استعفاگه چیقدی.
