ایران تامانیدن قۉللب-قوّتلنهدیگن یمن حوثيلری سعوديه عربستانیگه قرشی دېنگیز قملینی اعلان قیلدی.
الجزیره خبریگه کۉره، حوثيلر مطبوعات سۉزلاوچیسی یحیی سریع بوگون (دوشنبه، ۲۹-سرطان) شوندهی دېگن: «کۉزگه کۉز تمایلی اساسیده جنایتچی سعوديه دشمنیگه قرشی دېنگیز قملی اعلان قیلینهدی.»
اونینگ سۉزلریگه کۉره، مذکور دېنگیز قملی اعلان قیلینگن زهاتی کوچگه کیرگن.
یمن حوثيلری و سعوديه عربستانی اۉرتهسیدهگی کېسکینلیک اۉتگن هفته صنعا خلقارا قۉنالغهسیگه اویوشتیریلگن هجومدن سۉنگ کوچهیدی. اوشبو هجوم ایران اوچاقینینگ قۉنیشیگه تۉسقینلیک قیلگن اېدی.
مذکور هجوم اوچون مسوولیتنی سعوديه قۉللاویدهگی و خلق ارا همجعيت تامانیدن تن آلینگن یمن حکومتی مدافعه وزیرلیگی اۉز ذمّهسیگه آلدی. بیراق حوثيلر بو واقعهده سعوديه عربستانینی عیبلهدی.
حوثيلر هجومنی سعوديه گه نسبت بېرگچ، او بیلن توزیلگن صلحنی بېکار قیلگنینی اعلان قیلدی و سعوديه حدودیگه بیر نېچه راکت اوچیردی.
اولر سعوديه عربستانی و فارس کۉرفزی همکارلیک کېنگشی دولتلری تامانیدن صنعاگه نسبتاً قۉللنهیاتگن دېنگیز و هوا قملینی ناقانوني دېب حسابلهیدی همده اېندی «قملگه قمل بیلن جواب بېریشینی» بیلدیرگن.
حوثيلر حاضرده یمن نینگ غربي قِسمینینگ قریب اوچدن بیرینی، جملهدن پایتخت صنعا، مهم حدیده بندری و قیزیل دېنگیز ساحلینینگ کتّه قِسمینی نظارت قیلماقده.
