امریکا قۉشمه ایالتلری جمهور رییسی دونالد ترامپ امریکا و سعوديه عربستانی اۉرتهسیدهگی نا حربی مقصدلریدهگی هستهای کېلیشوونی تصدیقلشنی ریاضنینگ «ابراهیم کېلیشوولری» گه قۉشیلیشی و اسرایل بیلن مناسبتلرنی نارمللشتیریشیگه باغلهدی.
امریکا جمهور رییسی بوگون (پنجشنبه، ۱-اسد) کېچقورون معلوم قیلیشیچه، امریکا انرژی وزیرلیگی و سعوديه عربستانی اۉرتهسیده تیارلنهیاتگن نا حربی هستهای کېلیشووی «تصدیقلنهدی، اما بو تۉلیق سعوديه عربستانینینگ جوده حرمت قیلینهدیگن و موفقیتلی بۉلگن ابراهیم کېلیشوولریگه قۉشیلیشیگه باغلیق».
ترامپنینگ ایتیشیچه، مذکور کېلیشووگه موافق، هېچ قندهی یورانیومنی باییتیش ایشلری عملگه آشیریلمهیدی و دستور فقط تینچ، فقرالیک مقصدلریده فایدهلنیشگه قرهتیلهدی. اونینگ تأکیدلشیچه، بو ایران، بیرلشگن عرب امیرلیکلری و اَیریم باشقه دولتلردهگی نا حربی هستهای دستورلریگه اۉخشیدی.
او سۉزینینگ یکونیده: «امریکا نا حربی هستهای انشااتلریگه (یورانیومنی باییتیشسیز) قرشی اېمس،» دېدی.
بوگون امریکا انرژی وزیرلیگی امریکا و سعوديه عربستانی اۉرتهسیده هستهای همکارلیک بۉییچه کېلیشوو امضالنگنینی اعلان قیلیب، اوشبو کېلیشوو مطلقا تینچ مقصدلرگه خدمت قیلیشینی بیلدیرگن اېدی.
کېلیشوونی امریکا انرژی وزیری کریس رایتو سعوديه عربستانی انرژی وزیری عبدالعزیز بن سلمان امضالهگن.
شونگه قرهمهی، مذکور کېلیشوو تنقیدلرگه هم اوچرهدی. تنقیدچیلر یقین شرقده کېسکینلیک حلی هم یوقاری بۉلیب تورگن بیر پیتده سعوديه عربستانیده هستهای انشااتلر تشکیل اېتیلیشی منطقهده هستهای رقابتنی کوچهیتیریشی ممکنلیگینی تأکیدلهماقده.
