طالبلرنینگ نورستان ولایتیدهگی محلي مسووللرینینگ معلوم قیلیشیچه، ولایت مرکزی پارون شهریده یوز بېرگن ویرانکار سېلدن تۉرت کون اۉتگن بۉلسه-ده، بېدرَک یۉقالگن اوچ کیشینینگ جسدی حلی هم تاپیلمهگن.
طالبلرنینگ نورستان ولایت والیسی سۉزلاوچیسی فریدون صمیم بوگون (پنجشنبه، ۱-اسد) قیدیروو ایشلری اوشبو شخصلرنینگ جسدلرینی تاپیش اوچون همان دوام اېتهیاتگنینی ایتدی.
اونینگ سۉزلریگه کۉره، سېل عاقبتیده۲۲ کیشی جان بېرگن ینه۱۲۰ کیشی یرهلنگن.
بوندن اوّل طالبلرنینگ محلي مسووللری پارون شهریدهگی سېل عاقبتیده۱۰۰ نفردن آرتیق آدم بېدرَک یۉقالگنینی بیلدیرگن اېدی. اما حاضر اولر بېدرَک یۉقالگنلر سانینی۲۵ نفر دېب معلوم قیلماقده.
شونینگدېک، اولر سېل پارون شهری و اونینگ اطرافیدهگی قیشلاقلر اهالیسیگه قریب۳۵ میلیون امریکا دالری مقداریده ضرر یېتکزگنینی ایتدی.
بیراق، سېلدن جبرلنگنلر طالباننی تنقید قیلیب، جسدلرنی لای و بلچیق آستیدن چیقریش بۉییچه قیدیروو-قوتقروو ایشلری جوده سست کېتهیاتگنینی تأکیدلهماقده.
اولرنینگ ایتیشیچه، حاضرگچه ضرور یاردمنی آلمهگن و یاردم تشکیلاتلری همده انسانپرور مؤسسهلردن اولرنینگ احوالیگه زودلیک بیلن اعتبار قرهتیشنی سۉرهماقده.
نورستان ولایتی مرکزی پارون شهری دوشنبه کونی توشدن کېین کوچلی یامغیر و ویرانکار سېلنی باشدن کېچیردی.
کېچه اېسه ولایتنینگ مندال اولسواللیگیده هم کوچلی یامغیر و سېل کوزهتیلیب، عاقبتده۲۰ کیشی یرهلنگن.
