هرمز بۉغازی یاپیق قالهیاتگنی همده یمندهگی حوثيلرنینگ قیزیل دېنگیزده ایکّی نفت تانکریگه هجوم قیلیشی آرتیدن بیر بشکه نفت نرخی۶ فایزگه آشیب،۱۰۰ امریکا دالریدن یوقاریگه کۉتریلدی.
رویترز خبریگه کۉره، بو جاري ییل می آییدن بېری ایلک بار بیر بشکه نفت نرخی نینگ۱۰۰ دالردن آشیشی دیر.
حوثيلر سعوديه عربستانیگه قرشی قیزیل دېنگیزنی بلاکدهگه آلگنینی اعلان قیلگنیدن سۉنگ، بیر قطار نفت تانکرلر بابالمندب بۉغازی آرقهلی اۉتمسلیک اوچون اۉز یۉنهلیشینی اۉزگرتیردی.
رویترز معلوماتیگه کۉره، اَیریم تانکرلر سوئز کانالی آرقهلی اۉتیب، سۉنگ افریقا قطعهسینی ایلنیب آسیادهگی مزاجلرگه یۉل آلماقده. بو اېسه انچه اوزاق و قیمت حسابلنهدی.
یمندهگی حوثيلر، شونینگدېک، «انسلیا» و «لیلیا» ناملی سعوديه نفت تانکرلریگه بالیستیک و قناتلی راکتلر همده درونلر بیلن هجوم قیلگنینی، نتیجهده هر ایکّی تانکرده یانغین یوزهگه کېلگنینی معلوم قیلدی.
بیراق امریکا جمهور رییسی دونالد ترامپ قیزیل دېنگیزدهگی کېمهلرگه حوثيلر هجوملری دوام اېتسه، بو نینگ اوچون ایراننی جوابگر دېب بیلیشینی ایتدی. اونینگ تأکیدلشیچه، حوثيلر ایراننینگ «وکیل (پراکسی) گروهی» حسابلنهدی.
حوثيلر هجوملری باب المندب بۉغازی نینگ یاپیلیشیگه هم آلیب کېلیشی ممکن. اوشبو بۉغاز قیزیل دېنگیزنی هند اقیانوسی بیلن باغلهیدیگن استراتژیک یۉل بۉلیب، هرمز بۉغازیدن کېین دنیادهگی ایکّینچی اېنگ مهم انرژی تشیش یۉلهگی سنهلهدی.
بوندن اوّل هم ایران و امریکا اۉرتهسیدهگی اوروش آرتیدن هرمز بۉغازینینگ یاپیلیشی نفت نرخلری نینگ کېسکین آشیشیگه سبب بۉلگن و دنیا بۉیلب انرژی بحران یوزهسیدن جدّي خواطرلرنی کوچهیتیرگن اېدی.
ایران امریکا بیلن حربي تۉقنهشوولر قَیته باشلنگنیدن سۉنگ هرمز بۉغازینی ینه یاپگن. شو دور مابینیده سودا کېمهلری و نفت تانکرلریگه بیر نېچه بار هجوملر اویوشتیریلگنی حقیده خبرلر ترقهلگن.
