امریکا مخفي خدمتی جمهور رئیس اۉرین باسری جېدی ونسنینگ قۉریقچیلریدن بیری مخفي معلوماتلرنی آشکار اېتگنلیکده گمان قیلینیب، خدمتدن چېتلهتیلگنی و تېرگاو قیلینهیاتگنینی معلوم قیلدی.
انبیسی نیوز خبریگه کۉره، امریکا مخفي خدمتی مطبوعات سۉزلاوچیسی آنتونی گوگلیمی بیاناتیده جمهور رئیس اۉرین باسرینی حمایه قیلووچی بۉلینمه خادملریدن بیری عملیاتلر و مخفي معلوماتلر خوفسیزلیگینی خوف آستیگه قۉیگنلیک حقیدهگی عیبلاولر یوزهسیدن اداری همده احتمالي جنایي تېرگاو آستیده اېکنینی بیلدیرگن.
اونینگ سۉزلریگه کۉره: «مذکور ایش تفصیلاتلری حقیده ایضاح بېرمهیمیز. اما بیر نرسه مطلقا انیق: حمایهدهگی شخص خوفسیزلیگیگه تهدید سالیشی ممکن بۉلگن هر قندهی خطی-حرکتگه طاقت قیلینمهیدی.»
امریکا جمهور رئیس اۉرین باسری جې دی ونس دفتری بو مسأله یوزهسیدن ایضاح بېرمهدی.
بو حقده دستلب سیانان خبر بېرگن اېدی. منبعلرگه کۉره، جې دی ونسنی قۉریقلاوچی اوشبو خادم «اماس ناو» نشرینینگ جمهور رئیس اۉرین باسرینینگ سفر عادتلری حقیدهگی گزارشیده فایدهلنیلگن معلوماتلرنی سیزدیرگنلیکده گمان قیلینماقده.
«اماس ناو» خبریده اَیریم مخفي خدمت خادملری جی دی ونسنینگ سفرلری بیلن باغلیق ترتیبلردن ناراضی اېکنی ایتیلگن. نشر نینگ یازیشیچه، خدمت ایچیدهگی اَیریم خادملر اَیریم سفر و تاپشیریقلر دولت منبعلریدن نااۉرین فایدهلنیش بۉلیشی ممکنلیگیدن خواطر بیلدیرگن.
ترامپ مأموریتی ژورنالیستلرگه معلومات سیزدیریلیشیگه نسبتاً قطعي سیاست یوریتماقده. سۉنگّی مثاللردن بیری صفتیده نیویورک تایمز ژورنالیستلریگه ینگی «ایرفورس ون» اوچاقی بیلن باغلیق خوفسیزلیک مسألهلری یوزهسیدن تیارلنگن رایورتاژ سبب چقیروو کاغذی یوباریلگنی کېلتیریلماقده.
