ایران تامانیدن قۉللب-قوّتلنهیاتگن یمن حوثيلری سعوديه عربستانی باشچیلیگیدهگی ائتلاف هجوملریگه جوابن قیزیل دېنگیز بۉییدهگی «جیزان» و «ینبع» بندرلریده جایلشگن آرامکو نفت انشااتلرینی نشانگه آلگنینی معلوم قیلدی.
رویترز آژانسینینگ خبر بېریشیچه، حوثيلر مطبوعات سۉزلاوچیسی یحیی سریع بوگون (شنبه،۳ اسد) سعوديهنینگ دولت نفت شرکتی آرامکوگه قرهشلی تاسیساتلر موفقیتلی نشانگه آلینگنینی ایتگن.
رویترز اجتماعي ترماقلرده ترقهلگن ویدیونی تېکشیرگنینی و اونده «جیزان» بندریدهگی آرامکو نفتنی قَیته ایشلش فابریکهدن آسمان سری قلین توتون کۉتریلگنی عکس اېتگنینی بیلدیرگن.
یېتکرمه شونینگدېک، یونان خوفسیزلیک منبعلریگه تهیهنیب، ینبع بندریدهگی نفت انشااتلری تامان ایکّی بالیستیک راکت اوچیریلگنینی خبر قیلگن.
منبعلرگه کۉره، اوشبو راکتلر سعوديه عربستانیدهگی پاتریوت هوا مدافعه تیزیمی تامانیدن توتیب قالینگن. مذکور تیزیم سعوديه عربستانی و یونان اۉرتهسیدهگی کېلیشوو اساسیده حاضرده گرېک(یونان) حربيلری تامانیدن باشقریلماقده.
ینبع سعوديه عربستانینینگ قیزیل دېنگیزدهگی اېنگ مهم نفت بندری بۉلیب، او آرقهلی هر کونی میلیونلب بشکه نفت یوکلنهدی. اوشبو یۉنهلیش ایران تامانیدن یاپیلگن هرمز بۉغازینی چېتلب اۉتووچی اساسي اېکسپورت یۉلیگه ایلنگن.
یمن چېگرهسی یقینیده، قیزیل دېنگیز ساحلیده جایلشگن جیزان بندریده اېسه کونیگه۴۰۰مینگ بشکه قوّتگه اېگه نفتنی قَیته ایشلش فابریکه فعالیت یوریتهدی.
حوثيلر سعوديه قۉللاویدهگی و خلق ارا همجمعیت تامانیدن تن آلینگن یمن حکومتی ثنا خلقارا قۉنالغهسیگه ضربه بېرگنیدن سۉنگ سعوديه عربستانی بیلن توزیلگن اۉت آچیشنی تۉختهتیش کېلیشووینی بېکار قیلگن.
شوندن کېین گروه سعوديه عربستانیگه قرشی هجوملرنی باشلهدی و بو دولتگه نسبتاً دېنگیز قملینی اعلان قیلدی.
سعوديه عربستانی باشچیلیگیدهگی ائتلاف اېسه کېچه حوثيلر نظارتیدهگی الحدیده پورت شهری همده اونگه یقین آرالدهگی نشانلرگه هوا هجوملری اویوشتیردی.
