امریکا قۉشمه ایالتلری جمهور رییسی دونالد ترامپ ایرانگه قرشی حربي هجوملر دیپلوماتيککه ینه بیر امکانیت بېریش مقصدیده تۉختهتیلگنینی، بیراق مذاکرهلر نتیجه بېرمسه، ینهده کېنگ کۉلملی حربي عملیاتلر قَیته باشلنیشینی ایتدی.
ترامپ دوشنبه کونی (۵اسد) آکسیوس نشریگه بېرگن صحبتیده: «بیز ایران بیلن جوده جدّي و چوقور مذاکرهلر آلیب باریهپمیز. اگر بو مذاکرهلر نتیجه بېرمسه، جوده کېسکین حربي چارهلرنی قَیته قۉلهیمیز»، دېدی.
مذاکرهلرگه قنچه وقت بېریشگه تیارلیگی حقیدهگی سوالگه او: «کۉپ اېمس. یا تېز آلدینگه سیلجيدی، یا عموماً سیلجیمهیدی»، دېیه جواب بېردی.
دونالد ترامپ جمعه کونی امریکانینگ ایرانگه قرشی هجوملرینی تۉختهتیش حقیده بویروق بېرگن اېدی. اونینگ ایتیشیچه، بو قرار واسطهچیلر التماسیگه بناءً قبول قیلینگن.
«ایران بیلن علاقهده بۉلگنلرنینگ برچهسی مېندن اۉت آچمسلیکنی سۉرهدی»، دېدی ترامپ.
امریکانینگ ایرانگه قرشی هجوملری 13 کونلیک حربي تۉقنهشوودن سۉنگ تۉختهتیلگن. شوندن کېین ایران هم منطقهدهگی امریکا حربي پایگاهلریگه هجوملرنی تۉختهتگن.
حاضرده واسطهچیلر و منطقه دولتلری تامانلرنی مذاکرهلرنی قَیته باشلشگه اوندهماقده. مذاکرهلرده، جملهدن، هرمز بۉغازی و ایران نینگ هسته دستوری مسألهلری محاکمه قیلینماقده.
آکسیوس نینگ یازیشیچه، عملدهگی مذاکرهلر هرمز بۉغازینی خلقارا کېمهلر قتناوی اوچون قَیته آچیش و هسته دستوری بۉییچه ینگی کېنگ قمراولی کېلیشووگه اېریشیشگه قرهتیلگن.
نشر معلوماتیگه کۉره، مذاکرهلر اساسن ایران و عمان اۉرتهسیده آلیب باریلماقده. بیراق قطر، پاکستان، مصر، شونینگدېک ترامپ نینگ مخصوص وکیللری استیو ویتکاف و جرد کوشنرهم جریانده فعال اشتراک اېتماقده.
منطقوي منبعگه تهیهنیب یازیلیشیچه، تکلیفلردن بیریگه کۉره، ایران، عمان و باشقه منطقه دولتلری دېنگیز خوفسیزلیگی، اطراف-محیطنی محافظه قیلیش و باشقه خدمتلر اوچون کېمهلردن مقبول خدمت تۉلاولری اوندیریشنی یۉلگه قۉییشی ممکن.
بو بارهده مالاکا بۉغازی تجربهسی نمونه صفتیده کۉرسهتیلگن. او یېرده مالزیا، اندونزیا و سنگاپور کېمهلردن ترانزیت اوچون عمومي باج اېمس، بلکه انیق کۉرسهتیلگن خدمتلر اوچون حق آلهدی.
ینه بیر تکلیفگه کۉره، خلقارا دېنگیز تشکیلاتی (آیاماو) اشتراکیده قۉشمه جمغرمه تشکیل اېتیلیب، خدمت تۉلاولری شو جمغرمه آرقهلی باشقریلیشی ممکن.
ایران و امریکا پاکستان واسطهچیلیگیده اوروشنی یکونلش بۉییچه کېلیشوو امضالنگنیدن اوچ هفته اۉتیب، هرمز بۉغازینی باشقریش مسألهسیدهگی کېلیشماوچیلیک سبب ینه حربي حرکتلرنی باشلهگن اېدی.
حاضر واسطهچیلر استراتژیک اهمیتگه اېگه اوشبو دېنگیز یۉلینی قَیته آچیش اوچون تامانلرنی ینگی کېلیشووگه اېریشتیریشگه حرکت قیلماقده.
ایران هرمز بۉغازینی ینه یاپگنیدن سۉنگ جهان بازاریده نفت نرخی بیر بشکه اوچون 100امریکا دالریدن آشدی، بیراق جنگاور حرکتلر تۉختهتیلگچ، نرخ ینه 90 دالریدن پستگه توشدی.
