خوست و پکتیکا چېگرهسیده تاغ اېگهلیگی اوستیده ایکّی قبیله اۉرتهسیدهگی قوراللی تۉقنهشوو تۉرت کوندن بېری دوام اېتماقده.
خوست ولایتیدهگی منبعلرنینگ معلوم قیلیشیچه، سۉنگّی تۉرت کوندن بویان خوست و پکتیکا ولایتلری چېگرهسیدهگی بیر تاغگه اېگهلیک مسألهسی یوزهسیدن ایکّی قبیله اۉرتهسیده قوراللی تۉقنهشوو دوام اېتماقده.
منبعلرگه کۉره، ماجرا خوستدهگی «بوری خیل» قبیلهسی بیلن پکتیکادهگی «گیان خیل» قبیلهسی اۉرتهسیده کېچماقده. هر ایکّی تامان یېنگیل و آغیر قوراللردن فایدهلنماقده. بیر منبع نینگ ایتیشیچه، حاضرگچه اوشبو تۉقنهشووده کمیده ایکّی کیشی یرهلنگن.
خوست ولایتینینگ سپېره اولسواللیگی اهالیسی شاه میرخان نینگ اطلاعات روزگه بیرگن صحبتیده، سپېره اولسواللیگی بیلن پکتیکا نینگ گيان اولسواللیگی اۉرتهسیده جایلشگن تاغ زیچ چیلغآزه اۉرمانلریگه اېگه اېکنینی، هر ایکّی قبیله اېسه اونگه اېگهلیک دعوا قیلهیاتگنینی ایتدی.
اونینگ دعوا قیلیشیچه، مذکور تاغ اوستیدهگی نزاع قریب قیرق ییلدن بېری دوام اېتماقده. شو وقت ایچیده هر ایکّی تاماندن کمیده 80 کیشی هلاک بۉلگن یاکه یرهلنگن.
شاه میرخان طالبلر محلي رسميلریدن ایکّی قبیله اۉرتهسیدهگی قوراللی ماجرانی تۉختهتیش اوچون زودلیک بیلن چارهلر کۉریشنی سۉرهدی.
طالبلرنینگ خوست و پکتیکادهگی محلي مسووللری حاضرچه اوشبو واقعه یوزهسیدن هېچ قندهی ایضاح بېرمهگن.
