افغانستانلیک ضیالیلر، صنعتکارلر، شاعرلر، عیاللر، باله‌لر و امریکاده استقامت قیله‌یاتگن افغانستانلیکلر جماعه‌سی وکیللری اشتراکیده ۲۹-میزان — اۉزبېک تیلی ملي کونی مناسبتی بیلن مدني-ادبي تدبیر امریکانینگ پنسلوانیا ایالتیده فیلادیلفيا شهریده کېنگ نشانلندی.
اوشبو تدبیر تېمور مدني و اجتماعي اویوشمه‌سی تشبثی بیلن اۉزبېک تیلینی اسره‌ب-اوه‌یلش، افغانستان اۉزبېکلری نینگ مدني و ادبي میراثینی قدرلش، اجتماعي هم‌جهتلیکنی مستحکملش همده مدني قدریتلرنی کېله‌جک اولادلرگه یېتکزیش مقصدیده تشکیل اېتیلدی.
دستور دایره‌سیده مدني و علمي معروضه‌لر، شعرلر اۉقیش، موسیقي چیقیشلر، باله‌لر اوچون مخصوص دستورلر، شونینگدېک، اۉزبېکلر نینگ ملي طعاملری و عنعنوي کییملری کۉرگزمه‌سی تشکیل اېتیلدی.
تدبیر نینگ علمي-معرفي قِسمیده ایندیانا بیلیم یورتی‌نینگ استادی، دوکتور نظیف شهراني افغانستانده‌گی تورکي خلقلر، خصوصاً، اۉزبېکلر و تورکمنلر نینگ تاریخی و موقعی حقیده معروضه قیلدی. او اۉزبېک تیلینی نشانلش نینگ اهمیتیگه توخته‌لیب، اوشبو تیل نینگ افغانستان اۉزبېکلری نینگ تاریخي و مدني اۉزلیگینی سقلشده‌گی مهم رۉلینی تأکیدله‌دی. شونینگدېک، او بوگونگی و کېله‌جک اولادلر اوچون تاریخي ایلدیزلرنی انگلش، تیل و مدني میراثنی اسره‌ب-اوه‌یلش ضرورلیگی حقیده فکر بیلدیردی.
افغانستان‌نینگ تنیقلی صنعتکاری فرهاد دریا هم تدبیرده اشتراک اېتیب، سوزله‌دی و بدیعي دستورلرده قتنه‌شدی. او صنعت و موسیقی.نینگ انسانلرنی بیرلشتیریش، تیل و مدني خیلمه-خیللیککه حرمتنی کوچه‌یتیریش همده اجتماعي هم‌جهتلیکنی مستحکملشده‌گی اۉرنیگه علیحده اورغو بېردی.
شعریت و ادبیات هم تدبیر نینگ مهم قِسملریدن بیری بۉلدی. بیر گروه عیاللر اۉزبېک تیلیده‌گی شعرلرنی افاده‌لی اۉقیب، تیل نینگ گۉزللیگی و ادبي امکانیتلرینی نمایش اېتدیلر. شونینگدېک، شعریت و ادبیات نینگ آنه تیلینی اسره‌ب-اوه‌یلش، مدني قدریتلرنی اولادلرگه یېتکزیش، جمعیت نینگ خاطره‌لری و عنعنه‌لرینی سقلب قالیشده‌گی اهمیتی تأکیدلندی.
باله‌لر نینگ اشتراکی و اولر نینگ ادبي چیقیشلری تدبیر نینگ علیحده و اعتبارگه مالک قِسملریدن بیری بۉلدی. تدبیرده قتنه‌شگن باله‌لر اۉزبېک تیلی ملي کونی مناسبتی بیلن تبریکلر و قیسقه متنلر تقدیم اېتدیلر، اَیریملری اېسه اۉزبېک تیلیده شعرلر اۉقیدیلر.
تشکیلاتچیلرنینگ تأکیدلشیچه، اوشبو قِسم یاش اولادنی آنه تیلینی اۉرگنیش و اوندن فایده‌لنیشگه رغبتلنتیریش، باله‌لر نینگ اۉزیگه بۉلگن ایشانچینی آشیریش همده اولرنی عایله‌لری نینگ مدني میراثی بیلن تنیشتیریش مقصدیده تشکیل اېتیلگن.
شونینگدېک، اوشبو قِسمده برچه تیللرگه حرمت بیلن مناسبتده بۉلیش، تیل و مدني خیلمه-خیللیکنی قدرلش همده تورلی جماعه‌لر اۉرته‌سیده اۉزارا انگلشوونی مستحکملش مهم‌لیگی تأکیدلندی.
موسیقي دستورده فرهاد دریا، خیر محمد چاووش و سید کبیر کمال کبی تنیقلی صنعتکارلر اشتراک اېتیب، اۉزلری‌نینگ بدیعي چیقیشلری و یاقیملی کوی-قۉشیقلری بیلن تدبیرگه کۉترینکی روح به‌غایشله‌دیلر.
شونینگدېک، تدبیر دایره‌سیده اۉزبېکلر نینگ عنعنوي طعاملری و ملي کییملریدن عبارت کۉرگزمه تشکیل اېتیلیب، اشتراکچیلرگه افغانستان اۉزبېکلری نینگ مدنیتی، صنعتی و عنعنوي تورموش طرزی نینگ اَیریم جهتلری نمایش اېتیلدی.
تدبیر دوامیده مدني، ادبي و اجتماعي فعالیتلرنی رواجلنتیریشگه مناسب حصه قۉشگن بیر گروه صنعتکارلر، همکارلر و تېمور مدني و اجتماعي اویوشمه‌سی نینگ فعال اعضالری تشبث‌کارنامه و فخري یارلیقلر بیلن تقدیرلندیلر.
تدبیر اۉزبېکلر نینگ عنعنوي طعاملرینی تارتیق قیلیش، اشتراکچیلر اۉرته‌سیده‌گی صحبت و اوچره‌شوولر بیلن یکونلندی.
