پاکستان‌نینگ خیبر پختونخوا ایالتی سوا‌ت اولسواللیگیده پولیس بۉلیمی یقینیده صادر اېتیلگن خودکش هجوم عاقبتیده کمیده۱۳ کیشی، جمله‌دن سکّیز نفر پولیس هلاک بۉلدی، ینه۲۲ کیشی یره‌لندی.
فرانسه خبریگه کۉره، سوا‌ت اولسواللیگی پولیس قوماندانی نینگ اۉرین‌باسری فدا حسین‌نینگ ایتیشیچه، خودکش هجومچی پولیس بۉلیمیگه کیریشگه اورینگن پیتده خوفسیزلیک کوچلری تامانیدن باش دروازه آلدیده تۉخته‌تیلگن. شوندن سۉنگ او اۉزیگه باغلنگن پارتلاوچی مادّه‌لرنی پارتله‌تگن.
اونینگ سۉزلریگه کۉره، پارتلش گوجوم چارراهه‌ده، فقرالیک جمعیتی وکیللری ناراضیلیک نمایشی اۉتکزه‌یاتگن وقتده یوز بېرگن.
فدا حسین‌نینگ فرانسه خبر آژانسیگه: «اوشبو خودکش پارتلشده۱۳ کیشی، جمله‌دن سکّیز نفر پولیس خادیمی هلاک بۉلدی»، دېدی.
اونینگ قۉشیمچه قیلیشیچه،۲۲کیشی جراحت آلگن. شونینگدېک، هجومچیگه تېگیشلی اېکنی تخمین قیلینه‌یاتگن ینه بیر جسد شفاخانه‌گه آلیب باریلگن.
حاضرچه هېچ بیر قوراللی گروه اوشبو هجوم اوچون جوابگرلیکنی اۉز ذمّه‌سیگه آلگنی یۉق.
پاکستان رسميلری اوّل هم چېگره‌داش حدودلرده هجوملر کۉپه‌یگنینی افغانستان حدودیده فعالیت یوریته‌یاتگن قوراللی گروهلر بیلن باغلگن. بیراق طالبلر بو عیبلاولرنی رد اېتیب کېلماقده.
اسلام آبادنینگ تأکیدلشیچه، طالبلر افغانستان‌ده حاکمیتنی قَیته اېگه‌له‌گنیدن سۉنگ پاکستان‌نینگ شِمال-غربي حدودلریده قوراللی هجوملر سانی سېزیلرلی درجه‌ده آشگن.
