غربي کابلدهگی «امید سبز» شهرچهسیده یوزلب اویلرنی بۉشهتیش حقیده بویروق بېریلگنی یوزهسیدن ترقهلگن خبرلردن سۉنگ، طالبلرنینگ عدلیه وزیرلیگی اوشبو شهرچه یېرلری «امیرلیک نینگ مخصوص سودی شریعت قراری اساسیده دولت ملکی دېب تاپیلگنی و یېرلرنی ناقانوني اېگهللش نینگ آلدینی آلیش کمیسیون مذکور قرارنی اجرا اېتیشگه مسوول اېکنی» نی معلوم قیلدی.
وزیرلیک دوشنبه کونی (12 اسد) اعلان قیلگن بیاناتیده، حاضرده اوشبو شهرچهده اوی یاکه یېرگه اېگهلیک قیلهیاتگن شخصلر یېر نرخی و کۉریلگن ضرر اوچون ساتووچیگه مراجعت قیلیشلری ممکنلیگینی بیلدیردی.
طالبلرنینگ «مرکزي زون بۉییچه دولت یېرلری بیلن باغلیق ایشلرنی کۉرووچی مخصوص محکمه» جاري ییل نینگ 31 حمل کونی کابلنینگ 6 و 13-ناحیهلریده جایلشگن بیرمینگ 507،49 جریب «امید سبز» شهرچهسی یېرینی دولت ملکی دېب اعلان قیلگن.
طالبلر عدلیه وزیرلیگیگه کۉره، اوشبو قرارگه موافق مذکور یېر بېشته کدستر اوچستکهسی صفتیده دولت نامیگه رۉیخطدن اۉتکزیلگن و او حقیقی یاکه حکمی شخصلرگه قانوني روشده اۉتکزیلمهگن.
وزیرلیک نینگ قۉشیمچه قیلیشیچه، مخصوص محکمه نینگ شریعت قراریده اوشبو یېر یېرلرنی ناقانوني اېگهللش نینگ آلدینی آلیش و اېگهللب آلینگن یېرلرنی قَیتریش کمیسیونی تصرفیگه تاپشیریلیشی بېلگیلنگن. حاضرگی فایدهلنووچیلر اېسه یېر نرخی و یېتکزیلگن ضرر اوچون ساتووچیلرگه مراجعت قیلیشلری کېرهک.
عدلیه وزیرلیگی نینگ تأکیدلشیچه، مذکور کمیسیون دولت یېرلری بۉییچه مخصوص محکمه چیقرگن شریعت قرارلرینی تۉلیق اجرا اېتیشگه مجبور.
«امید سبز» شهرچهسی کابل نینگ غربیده جایلشگن بۉلیب، اونینگ اهالیسی اساسن هزارهلردن عبارت. شهرچه سۉنگگی ییگیرمه ییل ایچیده برپا اېتیلگن. ایتیلیشیچه، افغانستان سابق جمهور رئیس اۉرین باسری محمد کریم خلیلي نینگ اوکهسی محمد نبی خلیلي اوشبو شهرچه نینگ اساسي سهمدارلریدن بیری حسابلنهدی.
طالبان افغانستانده حاکمیتنی قَیته اېگهلهگنیدن بویان اۉنلب شهرچهلرنی تېکشیریب، اولر نینگ یېرلرینی دولت ملکی دېب اعلان قیلگن. بیراق شهرچه اېگهلری حجت و دلیللری کۉریب چیقیلیشی جریانیده خالصلیک تأمینلنمهیاتگنیدن شکایت قیلیب کېلماقده.
