طالبلر ایراننینگ کابلدهگی اېلچیخانهسی باشلیغی اۉرینباسری سید حسن مرتضوینینگ طالبلر مخالفلری آلیب بارهیاتگن اوروشنی «قرشیلیک» دېب حسابلهمسلیگی حقیدهگی بیاناتینی آلقیشلب، اونی «اعتبارگه لایق» دېب اتهدی.
طالبان مطبوعات سۉزلاوچیسی ذبیحالله مجاهد بوگون (دوشنبه،۱۲ اسد) طلوع نیوز تامانیدن اعلان قیلینگن اودیو مراجعتیده بو بیانات «ایراننینگ موضع سین افغانستان خلقی نینگ موضوعسی اېکنینی اثباتلهدی»، دېدی.
اونینگ سۉزلریگه کۉره، «افغانستانده هېچ کیم اوروش طرفداری اېمس» و تورلی ناملر آستیده «فتنه قۉزغهتهیاتگن» همده «خوفسیزلیکنی ایزدن چیقرهیاتگن» شخصلر قارهلنیشی کېرهک.
طالبلر شوندهی دېدی: «ایران اسلام جمهوریتی هم منطقوي خوفسیزلیک و برقرارلیک مهملیگینی انگلب یېتدی. افغانستان اسلام امیرلیگی (طالبلر) مملکت خوفسیزلیگینی تأمینلشگه موفق بۉلدی و بو بوتون منطقه منفعتیگه خدمت قیلهدی.»
ایراننینگ کابلدهگی اېلچیخانهسی باشلیغی اۉرینباسری سید حسن مرتضوی بیر نېچه کون اوّل ایران طالبانگه قرشی هېچ قندهی آقیم یاکه گروهنی قۉللب-قوّتلهمسلیگینی و اولر نینگ قوراللی کورهشینی هم «قرشیلیک» دېب اتَمهسلیگینی بیلدیرگن اېدی.
او کابلدهگی تدبیرلردن بیریده شوندهی دېگن اېدی: «غزهدهگی قرشیلیک عزیزدیر، لبناندهگی قرشیلیک عزیزدیر، بیز نینگ امریکاگه قرشی کورهشیمیز قرشیلیک اېدی. اما افغانستان عیالی بېوه قالسه، افغانستان بالهسی یېتیم قالسه، بو هم قرشیلیکمی؟»
مرتضوی، شونینگدېک، افغانستانده بیر نېچه ییلدن بویان «اسلامي دولت» برپا اېتیلگنینی دعوا قیلیب، ایراننینگ طالبان مخالفلریگه توصیهسی «باریب اۉزارا کېلیشیب آلینگ و معمالرینگیزنی بیرگهلیکده حل قیلینگ»، بۉلگنینی ایتدی.
ایران اېلچیخانهسی باشلیغی اۉرینباسری ینه تأکیدلشیچه، ایران افغانستاندهگی اَیریم مسألهلردن ناراضی، بو بارهده طالبلرگه اېسلتمه و مصلحت بېرهدی، بیراق مملکت ایچکی ایشلریگه ارهلشمهیدی.
