طالبلر ساغلیقنی سقلش وزیرلیگی خصوصي شفاخانه‌لرنی بهالش و طایفه‌لرگه اجره‌تیش جریانینی یکونله‌دی.
طالبلر ساغلیقنی سقلش وزیرلیگی خصوصي شفاخانه‌لرنی اعتباردن اۉتکزیش و درجه‌لرگه اجره‌تیش جریانینی یکونله‌گنینی اعلان قیلدی. شفاخانه‌لر کۉرسه‌تیله‌یاتگن خدمتلر صفتی بۉییچه «آی»، «بی»، «سی» و «اف» طایفه‌لریگه اجره‌تیلدی. اوشبو تصنیف اساسیده اولر اوچون نرخلر رۉیخطی بېلگیلنه‌دی.
طالبلر ساغلیقنی سقلش وزیرلیگی ساغلیقنی سقلش مؤسسه‌لرینی اعتباردن اۉتکزیش ریاستی اجراچی مدیری سیف‌الله معاویه بوگون (سه‌شنبه، ۲۸-میزان) کابلده بۉلیب اۉتگن ییغیلیشده معلوم قیلیشیچه، اوشبو جریان دوامیده کابلده‌گی ۱۱۵ ته خصوصي شفاخانه بهالنگن و اولردن فقط ایکّیته‌سی «ای» درجه‌سیگه لایق دېب تاپیلگن.
اونینگ قۉشیمچه قیلیشیچه، تۉقّیزته شفاخانه «بی»، ینه ۳۹ ته‌سی اېسه «سی» درجه‌سیگه کیریتیلگن.
طالبان رسميلری‌نینگ معلوماتیگه کۉره، بهالنگن باشقه شفاخانه‌لر «اف» درجه‌سیگه کیریتیلگن. بو اېسه بهالشدن «اۉته آلمه‌گنلیک»نی انگله‌ته‌دی.
طالبلر باش وزیری نینگ اداری ایشلر بۉییچه اۉرین‌باسری عبدالسلام حنفی اوشبو ییغیلیشده ایتیشیچه، بهالش ایشلری فقرالر نینگ طبي خدمتلر صفتی پستلیگی و نرخلر یوقاریلیگیدن بیلدیرگن شکایتلری اساسیده، مذکور گروه نینگ ساغلیقنی سقلش وزیرلیگی جماعه‌سی تامانیدن عملگه آشیریلگن.
اونینگ تأکیدلشیچه، «ای» درجه‌سیگه کیریتیلگن شفاخانه‌لر برچه یاکه اکثریت ستندردلرگه جواب بېرگن. بیراق او اوشبو ستندردلر نیمه‌لردن عبارت اېکنی و اولر قنده‌ی بېلگیلنگنیگه ایضاح بېرمه‌گن.
طالبلر باش وزیری نینگ اداری ایشلر بۉییچه اۉرین‌باسری خصوصي شفاخانه‌لر خدمتلر صفتینی یخشیلش آرقه‌لی قویی درجه‌لردن یوقاری درجه‌لرگه کۉتریلیشی ممکنلیگینی ایتگن.
اوشبو تصنیفدن کۉزلنگن مقصد «خصوصي شفاخانه‌لر اۉرته‌سیده ساغلام رقابتنی شکللنتیریش، طبي خدمتلر صفتینی آشیریش، بېمارلرگه کۉرسه‌تیله‌دیگن یاردمنی یخشیلش همده فقرالرگه ستندردلرگه ماس و ینه‌ده صفتلی طبي خدمتلر کۉرسه‌تیش اوچون شرایط یره‌تیش» اېکنینی بیلدیرگن.
طالبلر ساغلیقنی سقلش وزیری نور جلال جلالی هم اوشبو تصنیف آرقه‌لی «طبي خدمتلر صفتی یخشیلنیشی، نرخلر نظارت قیلینیشی و ساغلام رقابت اوچون شرایط یره‌تیلیشی»نی تأکیدله‌گن.
افغانستان فقرالری مملکتده طبي خدمتلر صفتی پستلیگیدن دایمي روشده شکایت قیلیب کېله‌دی. شو سببلی هر ییلی مینگلب افغانستانلیکلر دوالنیش اوچون خارجي مملکتلرگه باریشگه مجبور بۉلماقده.
