امریکانینگ بیرینچی خانیمی، آق اویده «دیپلماسی بشردوستانه» دایره‌سیده اۉتکزیلگن اوچره‌شوودن سۉنگ روسيه جمهور رییسی ولادیمیر پوتین و اوکراین جمهور رییسی ولادیمیر زلنسکيگه شخصي مکتوبلر یوباردی.
میلینا ترامپ بوگون (شنبه، ۱۶ عقرب) ایکس اجتماعي ترماغیده خبر نشر قیلیب، اۉز مکتوبلرینی ایکّی دولت وکیللریگه تاپشیرگنینی معلوم قیلدی. اونینگ ایتیشیچه، او هر ایکّی تاماندن برقرار تینچلیککه اېریشیش یۉلیده همکارلیکنی دوام اېتتیریشنی سۉره‌گن.
میلینا ایکّی کون اوّل آق اویده تاریخي اوچره‌شووگه مېزبانلیک قیلگن اېدی. اونده مسکو و کی‌یف وکیللری، جمله‌دن، پوتین نینگ مخصوص وکیلی کیریل دمیتريف، اوکراین پارلمانیده‌گی حکمران حزبی فرا‌کسیونی رهبری داوید آراخاویا همده اوکراین انسان حقوقلری بۉییچه نماینده‌سی دمیترو لوبینتس اشتراک اېتدی.
امریکا جمهور رییسی‌نینگ تورموش اۉرتاغی اوشبو اوچره‌شووده پوتین و زلنسکي اونینگ آلېشکی شهریده «گومانیتار صلح» اعلان قیلیش حقیده‌گی التماسینی قبول قیلگنینی آلقیشله‌دی. اونینگ تأکیدلشیچه، «آلېشکی صلحی» برقرار و ابدي تینچلیککه اېریشیش اوچون بیر اوچقون بۉلیشی ممکن.
آلتی کونلیک اوشبو صلح ۲۷-اکتوبردن ۱-نوامبرگچه خرسان ولایتی نینگ آلېشکی شهریده عمل قیلدی. مذکور شهر روسيه اوردوسی تامانیدن اېگه‌للنگن و حاضرگچه اونینگ نظارتی آستیده قالماقده.
جنگلر کوچه‌ییب، تینچ اهالی وکیللری اوشبو حدودده قملیب قالگنی سببلی میلینا ترامپ واسطه‌چیلیک قیلدی. او پوتین و زلنسکيگه بې‌واسطه مراجعت قیلیب، صلح اعلان قیلیشنی سۉر‌ه‌دی. نتیجه‌ده گومانیتار یاردم یېتکزیش و ۸۰۰ گه یقین تینچ اهالینی تخلیه قیلیش امکانیتی یره‌تیلدی.
اوکراین مسأله‌لریگه اره‌لشووینی «دیپلماسی بشردوستانه» دېب اته‌یدیگن میلینا ترتمپ بوندن اوّل هم عایله‌لریدن اجره‌تیلگن اوکراینلیک باله‌لرنی قَیتریشده مهم رۉل اۉینه‌گن.
اونینگ سعی-حرکتلری دایره‌سیده ۳۴نفر اوکراینلیک باله آلتی باسقیچده روسيه‌دن قَیتریلیب، اۉز عایله‌لریگه تاپشیریلگن.
