طالبلر رهبری هبتالله آخوندزاده وزیرلر کېنگشی ییغیلیشیده خلققه دین و عقیدهنی اۉرگهتیش ضرورلیگینی تأکیدلب، «اسلامي تیزیم نینگ مستحکملیگی دیني تعلیم آرقهلی تأمینلنهدی»، دېدی.
او طالبلر عملدارلریگه مراجعت قیلیب شوندهی دېدی: «خلققه دیننی اۉرگهتیشگه حرکت قیلینگ، دیني ترغیبات آلیب بارینگ، برچهنگیز تقواده ثابت بۉلینگ، تقوادن چېکینمنگ. سیزلر قطعیت بیلن ایش توتینگ و کمترلیک کۉرسهتینگ. آدملرگه دیني بیلیم بېرینگ همده اولرنی اخلاقسیزلیک و ناتۉغری غایهلر تأثیریدن اسرهنگ.»
طالبلر مطبوعات سۉزلاوچیسی اۉرینباسری حمدالله فطرت بوگون (شنبه،۲۳ جوزا) نشر قیلگن بیاناتگه کۉره، طالبلر رهبری قندهاردهگی ییغیلیشده بیر نېچه بار دین و عقیدهنی خلققه اۉرگهتیش مسألهسیگه اورغو بېرگن.
او نطقی نینگ بیر قِسمیده شوندهی دېگن: «آدملرنی دین، شریعت و اسلامي تیزیم حقیده خبردار قیلینگ و اۉزینگیزنی یخشی نظارت قیلینگ.»
ملا هبتالله ینه بیر بار طالبلر عملدارلریدن خلققه «تۉغری عقیده»نی اۉرگهتیشنی طلب قیلدی. او شوندهی دېدی: «دیني علمنی مملکت نینگ برچه حدودلریگه یېتکزینگ. دیني علمنی قَیته جانلنتیرینگ، چونکه اسلامي تیزیم عیناً شو آرقهلی مستحکملنهدی. علمنی امکان قدَر کېنگ یاییشگه و دیننی تیریک سهقلشگه حرکت قیلینگ.»
طالبلر رهبری گروه عملدارلرینی اۉز فرمانلرینی دقّت بیلن اۉرگنیشگه همده اولرنی عملگه آشیریش و خلققه یېتکزیش یۉلیده تۉلیق سعی-حرکت قیلیشگه چقیردی.
شونینگدېک، او طالبان عملدارلریدن اۉز عملي ایشلری آرقهلی اسلام و دیننی خلققه نمایان اېتیشنی سۉرهدی.
طالبان اۉز باشقروو تیزیمینی «اسلامي تیزیم» دېب اتهیدی. گروه اۉزینی شریعتگه عمل قیلهیاتگنینی تأکیدلهیدی. بیراق تنقیدچیلر و اَیریم دیني متخصصلر نینگ فکریچه، طالبان جاري اېتگن کۉپلب چېکلاولر باشقه مسلمان مملکتلریده اوچرهمهیدی و اولر دینی سیاسي مقصدلرده سوءاستعمال قیلیشده عیبلنماقده.
