کانادانینگ تورانتو شهری پولیسی «سالسا» فستیوالی وقتیده صادر بۉلگن آتیشمه عاقبتیده ایکّی کیشی هلاک بۉلگنی، ینه بېش کیشی یره آلگنینی معلوم قیلدی.
تورانتو پولیسی ایکس اجتماعي ترماغیده نشر قیلگن بیاناتگه کۉره، حادثه شنبه کونی (۲۰-سرطان) محلي وقت بیلن ساعت۸:۱۲ده شهرنینگ میدتاون منطقهسیده یوز بېرگن.
بیاناتده ایتیلیشیچه، آتیشمه عاقبتیده ایکّی کیشی واقعه جاییده جان بېرگن، ینه بېش نفر جبرلنووچی شفاخانهگه یېتکزیلگن.
تورانتو پولیسی حاضرچه گمانلنووچی، هجوم سببی یاکه اوشبو حادثه یوزهسیدن بیرار شخص قۉلگه آلینگنی حقیده معلومات بېرمهگن.
شو بیلن بیرگه، کانادا باش وزیری مارک کارنی ایکس اجتماعي ترماغیده بېرگن بیاناتیده اوشبو آتیشمهدن «دهشتگه توشگنینی» بیلدیردی.
کارنی قربانلر و اولرنینگ یقینلریگه همدردلیک بیلدیریب، آتیشمهنی صادر اېتگن شخصلرنی قۉلگه آلیش اوچون پولیس اونینگ تۉلیق قۉللب-قوّتلشیگه اېگه اېکنینی تأکیدلهدی.
«سالسا» فستیوالی هر ییلی اۉتکزیلهدیگن لاتین امریکالیکلر مدني بیرهمیدیر. جاري ییلده فستیوال نینگ 22-مراتبه اۉتکزیلهیاتگن رسمي دستوری تورانتو شهریده دوام اېتماقده. ایکّی کونلیک تدبیرده لاتین امریکاسی اهالیسی ملي لباسلرده «سالسا» رقصینی اجرا اېتهدی، اوشبو صنعتنی باشقهلرگه بېپول اۉرگهتهدی همده اۉزلری نینگ ملي طعاملری و مدنیتینی نمایش اېتهدی.
