امریکا قۉشمه ایالتلری جمهور رییسی دونالد ترامپ تجارت کېمهلری و نفت تانکرلرینینگ هرمز بۉغازی آرقهلی اۉتیشی اوچون جاري اېتیلیشی رېجهلشتیریلگن۲۰ فایزلیک تۉلاونی بېکار قیلیشگه قرار قیلگنینی و اونینگ اۉرنیگه فارس کۉرفزی دولتلرینینگ امریکاگه سرمایه کیریتیشینی پیشنهاد اېتگنینی معلوم قیلدی.
ترامپ بوگون کېچقورون (سهشنبه، ۲۳-سرطان) تروثسوشیال ترماغیده یازیشیچه، بو قرار یقین شرق یېتکچیلری بیلن جوده ثمرهلی مذاکرهلردن سۉنگ قبول قیلینگن.
او شوندهی یازدی: «بو سرمایهلر نهایتده ییریک بۉلهدی و عینِ پیتده اۉشه مملکتلر همده اولرنینگ کېلهجگی اوچون هم جوده فایدهلی بۉلهدی.»
دونالد ترامپ تیناوون امریکا هرمز بۉغازی نظارتینی اۉز قۉلیگه آلیشی و کېمهلر خوفسیزلیگینی تأمینلش عوضیگه۲۰ فایز تۉلاو اوندیریلیشینی اعلان قیلگن اېدی.
بیراق ایران اسلام انقلابی قۉریقچیلری امریکاگه هرمز بۉغازی باشقروویگه ارهلشیشگه هېچ قچان رخصت بېریلمسلیگینی و اوشبو سوو یۉلیدهگی هر قندهی ارهلشووگه قطعي جواب قَیتریلیشینی بیلدیرگن.
ترامپ بوگونگی بیاناتیده، شونینگدېک، امریکا قوراللی کوچلری طفیلی هرمز بۉغازی حاضر ایران بیلن باغلیق کېمهلردن تشقری برچه کېمهلر اوچون آچیق اېکنینی تأکیدلهدی.
او بو وضعیتنی «ایران نینگ یالغانچی، زۉرآور و یاووز رهبری» سیاستی نینگ عاقبتی دېب اتهدی و او مملکتنی تۉلیق هلاکت سری یېتهکلهیاتگنینی ادعا قیلدی.
ترامپ ینه بیر بار امریکا ایراننینگ دېنگیز قملینی قَیته تیکلشی، ایران بندرلریگه کېمهلر کیریب-چیقیشینی همده اوشبو مملکت بیلن باغلیق هر قندهی یوک تشیلیشینی تۉسیشینی تأکیدلهدی.
