امریکا قۉشمه ایالتلری و سعوديه عربستانی انرژی وزیرلری ایکّی دولت اۉرتهسیدهگی تاریخي هستهای همکارلیک تۉغریسیدهگی بیتیمنی امضالهدیلر.
امریکا انرژی وزیرلیگی پنجشنبه کونی (۱-اسد) نشر قیلگن بیاناتیده اوشبو همکارلیک فقط تینچ مقصدلر اوچون عملگه آشیریلیشینی بیلدیردی.
بیتیمگه امریکا انرژی وزیری کریس رایت و سعوديه عربستانی انرژی وزیری عبدالعزیز بن سلمان امضا چېکدی.
یقین شرقده هستهای رقابت کوچهییشی ممکنلیگی حقیدهگی تنقیدلر آرتیب بارهیاتگن بیر پیتده، امریکا انرژی وزیرلیگی اوشبو کېلیشوو هسته خوفسیزلیگی، هسته محافظهسی و هستهای قوراللرنی ترقهتمسلیک بۉییچه اېنگ یوقاری خلقارا ستندردلرگه رعایه قیلیشینی تأکیدلهدی.
کریس رایت شوندهی دېدی: «ایشانچینگیز کامل بۉلسین، اوشبو بیتیم هسته خوفسیزلیگی و هستهای قوراللرنی ترقهتمسلیک بۉییچه اېنگ یوقاری ستندردلرگه تۉلیق عمل قیلهدی».
اونینگ قۉشیمچه قیلیشیچه، مذکور کېلیشوو امریکا صناعتی، ایشچیلری و تأمینات زنجیرلری اوچون فایدهلی بۉلیشی بیلن بیرگه، سعوديه عربستانی نینگ انرژی احتیاجلرینی قاندیریشگه هم خدمت قیلهدی.
سعوديه عربستانی انرژی وزیرلیگی هم علیحده بیانات بېریب، بیتیمنی تینچ مقصدلرگه قرهتیلگن هستهای همکارلیک دېب اتهدی.
وزیرلیککه کۉره، بیتیم ایکّی دولت اۉرتهسیده هستهای انرژیدن تینچ مقصدلرده فایدهلنیش، تجربه، بیلیم و تکنالوژيلر المشینووینی رواجلنتیریش مقصدیده امضالنگن.
شونینگدېک، سعوديه تامانی هم بیتیم هستهای خوفسیزلیگی، هستهای محافظهسی و هستهای قوراللرنی ترقهتمسلیک بۉییچه اېنگ یوقاری خلقارا ستندردلرگه اساسلنگنینی تأکیدلهدی.
بیراق اوشبو کېلیشوو تنقیدلرگه هم سبب بۉلماقده.
رویترز خبرگزارلیگینینگ یازیشیچه، تنقیدچیلر سعوديه عربستانیده هستهای انشااتلر برپا اېتیلیشی، یقین شرقدهگی کېسکین وضعیت یانیده، منطقهده هستهای پایگاهنی کوچهیتیریشی ممکنلیگینی تأکیدلشماقده.
دموکرات ادوارد مارکی شوندهی دېدی: «اولر سعوديه عربستانیگه – دشمنانه و اوتاریتر دولتگه – هستهای قورال تکنالوژيلرینی رواجلنتیریش امکانینی بېرماقده. شو بیلن بیرگه، ایراننینگ هستهای بۉمبهگه اېگه بۉلیشی نینگ آلدینی آلیش بهانهسیده ایرانگه قرشی اوروش باشلهماقده. بو کېلیشوو برچهمیز نینگ خوفسیزلیگیمیزنی ضعیفلشتیرهدی».
سعوديه عربستانی ولیعهد شهزادهسی محمد بن سَلمان بیر نېچه بار مملکتی هستهای قورال ایشلب چیقیشنی ایستهمسلیگینی، بیراق اگر ایران بوندهی قورالگه اېگه بۉلسه، سعوديه عربستانی هم شوندهی یۉل توتیشینی ایتگن.
قیمتی انیق آچیقلنمهگن، اما اۉنلب میلیارد امریکا دالریگه بهالنهیاتگن اقش–سعوديه هستهای همکارلیک بیتیمی۳۰ییل مدتگه مۉلجللنگن. اونگه کۉره، امریکا شرکتلری سعوديه عربیستانیده «ایپی۱۰۰۰» روسومیدهگی هستهای رئاکتورلرنی قورهدی. اوشبو رئاکتورلر امریکا نظارتی آستیده فقط برق انرژیسی ایشلب چیقریش و علمي تدقیقاتلر اوچون فایدهلنیلهدی.
