ایران تشقی ایشلر وزیری عباس عراقچینینگ ایتیشیچه، اونینگ اوکراینلیک همکسبی آندری سیبیها تیلفون آرقهلی ملاقاتده خزر دېنگیزیدهگی ایران کېمهسیگه اویوشتیریلگن هجوم قصداً عملگه آشیریلمهگنینی بیلدیرگن.
عراقچی سهشنبه آقشامی( ۶اسد) ایکس اجتماعي ترماغیده یازیشیچه، اوکراین تشقی ایشلر وزیری اونگه «ایران کېمهسیگه قیلینگن هجوم تصادفي بۉلگنینی و اوکراین کېسکینلیکنی کوچهیتیریشنی ایستهمسلیگینی» معلوم قیلگن.
عراقچی شوندهی دېدی: «ایران هم کېسکینلیک نینگ کوچهییشینی ایستهمهیدی. بیراق مېن فقرالریمیز یاکه منفعتلریمیزگه قرهتیلگن هر قندهی هجوم مطلقا قبول قیلیب بۉلمسلیگینی انیق ایتدیم. یېتکزیلگن ضرر قاپلنیشی کېرهک.»
اوکراین تشقی ایشلر وزیری آندری سیبیها هم اوشبو تیلفون صحبتینی تصدیقلب، «کېرهکسیز کېسکینلیکنینگ آلدینی آلیش» ضرورلیگینی تأکیدلهگنینی بیلدیردی.
او شوندهی دېدی: «اوکرایننینگ برچه حرکتلری فقط مملکتیمیزنی روسيه تجاوزیدن حمایه قیلیشگه قرهتیلگن. بیز هېچ قچان فقرالیک کېمهلری یاکه تینچ اهالیگه ضربه بېریشنی مقصد قیلمهگنمیز.»
شو هفته شنبه کونی اوکراین جمهور رییسی والادیمیر زلنسکي مملکتی خزر دېنگیزیده ایران کېمهسینی نشانگه آلگنینی معلوم قیلگن اېدی.
زلنسکي اوشبو کېمه روسيهگه اوکراینگه قرشی فایدهلنیش اوچون ایران قورال-یراغی و اۉق-داریلرینی آلیب کېتهیاتگنینی دعوا قیلگن.
اما ایران تشقی ایشلر وزیرلیگی بو کېمه تجارت کېمهسی بۉلگنی و اونینگ یوکی حربي اېمس، فقرالیک یوکیدن عبارت بۉلگنینی بیلدیردی. هجوم عاقبتیده بیر نفر دېنگیزچی هلاک بۉلگن.
عباس عراقچی دستلب اوشبو هجوم اسرایلنینگ کۉرسهتمسی بیلن عملگه آشیریلگنینی و بوندن مقصد اروپانی ایرانگه قرشی اوروشگه جلب قیلیش بۉلگنینی ایتگن اېدی.
