امریکا قۉشمه ایالتلری تشقی ایشلر وزیرلیگی دنیا نینگ۵۰ مملکتی وطنداشلریدن ویزه آلیش اوچون۲۰ مینگ امریکا دالریگچه گرو پولی طلب قیلیش ترتیبینی دایمي روشده جاري اېتدی.
رویترز خبرگزارشلیگینینگ خبر بېریشیچه، بو حقدهگی قرار جمعه کونی اقش نینگ «ثبت فدرال»ده اعلان قیلینگن.
بیلدیریشنامهده ایتیلیشیچه، قنسوللیک خادملری مهاجر بۉلمهگن ویزه طلبگارلریدن ویزه بېریش شرطی صفتیده۲۰ مینگ امریکا دالریگچه گرو پولی تۉلهشنی طلب قیلیشی ممکن.
حجتگه کۉره، گرو پولی مقداری قنسوللیک خادیمی نینگ قراریگه بناءً بېلگیلنهدی. بو ترتیب اساسن بیزنس و سیاحلیک مقصدیده بېریلهدیگن ب-۱ و ب-۲ توریدهگی ویزهلرگه تطبیق اېتیلهدی.
رویترزنینگ یازیشیچه، اوشبو قاعدهلر جاري آی نینگ۳-سنهسیدن باشلب، فدرال رېسترده رسماً اعلان قیلینگن پیتدن کوچگه کیرهدی.
خبرگزارلیک معلوماتیگه کۉره، اوشبو دستور قمرهب آلگن۵۰ مملکت نینگ۳۰ تهسی افریقا قطعهسیده جایلشگن.
امریکا رسميلری بو سیاستدن مقصد ویزه نینگ عمل قیلیش مدتی توگهگنیدن کېین مملکتده ناقانوني قالیش حالتلرینی کمهیتیریش اېکنینی اَیتماقده. بیراق مهاجرلر حقوقلرینی حمایه قیلووچی تشکیلاتلر بو قرار امریکاگه قانوني و اساسلی سفرلرنی هم قیینلشتیریشینی تأکیدلهماقده.
امریکا «ویسه باند پیلات پراگرام» (ویزه گروی سیناو دستوری)نی ۲۰۲۵-ییلده سیاحتچیلر ویزهسی مدتی توگهگچ اۉز مملکتیگه قَیتیشینی کفالتلش مقصدیده ایشگه توشیرگن اېدی.
سیناو دستوری دوامیده قنسوللیک خادملری۵ مینگ۱۰ مینگ یاکه اېنگ کۉپی بیلن۱۵مینگ امریکا دالری مقداریده گرو طلب قیلیشی ممکن اېدی. یکوني قاعدهلرگه کۉره اېسه 5 مینگ دالرلیک وریانت بېکار قیلیندی، ماکسیمال گرو مقداری اېسه۲۰ مینگ امریکا دالریگچه آشیریلدی.
امریکا جمهور رییسی دونالد ترامپ آق اویگه قَیتگنیدن سۉنگ اقشگه سفر و مهاجرت بۉییچه قطار قطعي چېکلاولرنی جاري اېتدی.
اونینگ ایتیشیچه، بو چارهلر ناقانوني مهاجرتنی جلولش و امریکا ملي خوفسیزلیگینی مستحکملشگه قرهتیلگن. بیراق اونینگ مأموریتی قانوني مهاجرت جریانینی هم انچه مرکّبلشتیردی.
ترامپ ۲۰۲۵-ییل جون آییده چیقرگن فرمانی بیلن۱۲ مملکت، جملهدن افغانستان فقرالری نینگ امریکاگه کیریشینی تۉلیق تعقیقلهدی.
مذکور فرمان اعلان قیلینگچ، امریکا اوردوسی و امریکا تشکیلاتلری نینگ سابق همکارلری همده اولرنینگ عایله اعضالرینی کۉچیریش جریانی تۉختهب قالدی. اولرنینگ مینگلب نفری هنوز قطر و پاکستان کبی منطقه دولتلریده امریکاگه کۉچیریلیشینی کوتماقده.
