هزاره دیاسپوراسی نمایندهلرینینگ احوالی و احتیاجلری همده ینگی کېلگن مهاجرلرنینگ مېزبان جمعیتلرگه قۉشیشگه بغیشلنگن «هزاره دیاسپوراسی ترماغی» نینگ اوچینچی ییغینی سویدن نینگ مالمو شهریده بۉلیب اۉتدی.
ایکّی کون دوام اېتگن اوشبو انجمن «مېزبان جمعیتلرده قۉشیلیش و اشتراک سری یۉل» موضوعسی آستیده شنبه کونی باشلنگن اېدی.
ییغین دوامیده افغانستاننینگ تنیقلی آوازخوانی داوود سرخوش کۉپ ییللیک اوزلوکسیز صنعت و مدنیت ساحهسیدهگی خدمتلری اوچون تقدیرلنیب، اونگه منّتدارچیلیک یارلیغی تاپشیریلدی.
یکوني قطعنامهده اشتراکچیلر مذهبی و اېتنیک زۉرآورلیکنی اۉز ایچیگه آلگن برچه کۉرینیشدهگی اېکسترېمیزم و زۉرآورلیکنی کېسکین قارهلب، نفرت ترغیباتی، کمسیتیش، زۉرآورلیک همده جمعیت نینگ قطبلنیشیگه قرشی کورهشیش ضرورلیگینی تأکیدلهدیلر.
اولر هزاره جمعیتی افغانستانده اۉنلب ییللر دوامیده مذهبی و اېتنیک اېکسترېمیزم نینگ اساسي قربانلریدن بیری بۉلگنینی اېسلهتیب، بو خلق هېچ قچان اېکسترېمیزم و زۉرآورلیکنی ترغیب قیلیش واسطهسیگه ایلنتیریلمسلیگی کېرهکلیگینی قید اېتدیلر.
قتنشچیلر هزارهلر تینچ-تاتوو یشش، بغریکېنگلیک، انسان حقوقلری، تېنگلیک و فقرالیک اشتراکی تمایللریگه تهیهنگن حالده مېزبان مملکتلرده خوفسیز، دېموکراتیک و اینکلیوزیو جمعیتلرنی مستحکملشده فعال رۉل اۉینشی لازملیگینی تأکیدلهدیلر.
شونینگدېک، اولر هزاره مهاجرلرینینگ مېزبان جمعیتلرگه موفقیتلی قۉشیلیشی بیلن بیر قطارده، اولر نینگ ملي اۉزلیگی و مدنیتینی سقلب قالیش مهملیگینی هم علیحده قید اېتدیلر.
ییغین اشتراکچیلری هزارهلر اۉز تیلی، مدنیتی و ملي اۉزلیگینی سقلهگن حالده مېزبان مملکتلرده فعال، مسوولیتلی و بنیادکار فقرالر صفتیده اجتماعي، تعلیم، اقتصادي، مدني و فقرالیک حیاتیده فعال اشتراک اېتیشلری ممکنلیگینی بیلدیردیلر.
اولر اینیقسه یاشلر، ایکّینچی اولاد همده ینگی کېلگن مهاجرلر نینگ تعلیم، تیل اۉرگنیش، ایش بیلن تأمینلنیش، اجتماعي خدمتلردن فایدهلنیش و مدنی فعالیتیده اشتراک اېتیش امکانیتلرینی کېنگهیتیریشگه علیحده اعتبار قرهتدیلر.
ییغین یکونیده «هزاره دیاسپوراسی ترماغی» باشقه تشکیلاتلر، جماعت اربابلری و فعاللرنی مهاجرلرنی قۉللب-قوّتلش همده عمومي مقصدلرنی ایلگری سوریشده همکارلیک قیلیشگه چقیردی.
هزارهلر اروپا دولتلری و دنیا نینگ باشقه مملکتلریدهگی افغانستان مهاجرلری نینگ سلماقلی قِسمینی تشکیل اېتهدی.
تاریخي کمسیتیشلر، مجبوري کۉچیریشلر و ییللر دوام اېتگن نشانلی هجوملر سبب کۉپلب هزاره لر افغانستاننی ترک اېتیشگه مجبور بۉلگن. اولرنینگ بیر قِسمی اروپا و دنیا نینگ باشقه مملکتلریگه باریب جایلشیشگه موفق بۉلگن.
