اتریش ایچکی ایشلر وزیرلیگی آغیر مالی جنایتلر و گیاهوند مادّهلر بیلن باغلیق جنایتلر اوچون محکمه قیلینگن افغانستانلیک مهاجر مملکتدن چیقریب یوباریلگنینی معلوم قیلدی.
وزیرلیک بیاناتیده ایتیلیشیچه، دېپورت قیلینگن شخص۲۶ یاشلی اېرکک بۉلیب، او دوشنبه کونی ۹ سنبله وېندن استانبولگه، او یېردن اېسه کابلگه آلیب کېتیلگن.
اتریش ایچکی ایشلر وزیری گرهارد کارنر، مهاجرلرنی دېپورت قیلیش مملکت پولیسی اوچون «قیین وظیفه» اېکنینی ایتگن.
او «بو قیین، اما عدالتلی یۉل ایزچیل دوام اېتتیریلهدی»، دېیه قۉشیمچه قیلگن.
آلمان، اتریش و سوئیس کبی آلمان تیلیده سۉزلشووچی دولتلر طالبان بیلن علاقهگه کیریشگن و افغانستانگه مهاجرلرنی دېپورت قیلیشنی قَیته باشلهگن ایلک اروپا دولتلری قطاریگه کیرهدی.
اتریش اۉتگن ییلی اوچ نفر، جاري ییلده اېسه ایکّی نفر مهاجرنی طالبان بیلن موافقلشتیرگن حالده افغانستانگه دېپورت قیلگن.
اتریش نهفقط آغیر جنایتلر اوچون محکمه قیلینگن مهاجرلرنی افغانستانگه، بلکه باشقه دولتلرگه هم قَیترهدی.
اتریش ایچکی ایشلر وزیرلیگی تقدیم اېتگن آمارگه کۉره، مملکت جاري ییل نینگ دستلبکی یېتّی آییده قریب ۸ مینگ ۸۰۰ نفر مهاجرنی اۉز وطنلریگه یاکه «دوبلین» دستوری آرقهلی باشقه دولتلرگه دېپورت قیلگن. دېپورت قیلینگنلرنینگ 48 فایزی ایلگری جنایي جوابگرلیککه تارتیلگن.
اتریش طالبان بیلن علاقهلرنی باشلهگن سۉنگگی ایکّی ییل دوامیده کمیده ایکّی مرته طالبان هیئتلرینی رسماً قبول قیلگن. تشقی کۉرینیشده بو هیئتلر مهاجرلرنی دېپورت قیلیشنی موافقلشتیریش اوچون وین گه تشریف بویورگن.
