جهان ساغلیقنی سقلش تشکیلاتی افغانستان‌نینگ شرقي منطقه‌لریده «دنگی ایسیتمه‌سی» بیلن کسللنیش حالتلری آرتیب باره‌یاتگنینی معلوم قیلدی.
اوشبو تشکیلات بوگون (پنج‌شنبه، ۱۴ عقرب) ایکس اجتماعي ترماغیده نشر قیلگن پُستیده افغانستانلیکلرمی چیبین چه‌قیشیدن حمایه قیلیشگه همده اۉزلرینی ناخوش حس قیلگن تقدیرده، اۉز وقتیده داکترگه مراجعت قیلیشگه چقیرگن.
بوندن اوّل ننگرهار ولایتیده‌گی محلي منبعلر «اطلاعات‌روز» گزیته‌سیگه اوشبو ولایتده دنگی ایسیتمه‌سی بیلن کسللنیش حالتلری آرتیب باره‌یاتگنینی معلوم قیلگن و جلال آباد شهری همده مۉمند دره تومنیده ایکّی نفر یاش اوشبو کسللیک عاقبتیده وفات اېتگنینی بیلدیرگن اېدی.
منبعلرنینگ ایتیشیچه، هر ایکّی ییگیت بیر نېچه هفته‌دن بېری ننگرهار ولایتیده‌گی محلي شفاخانه‌لردن بیری‌نینگ یوقوملی کسللیکلر بۉلیمیده دوالنه‌یاتگن بۉلگن. بیراق اولردن بیری ۹ عقرب، ایکّینچیسی اېسه ۱۰ عقرب کونی وفات اېتگن.
ننگرهار ولایتی اهالیسی اوشبو کسللیک بیلن کسللنیش حالتلری آرتیب باره‌یاتگنیدن خواطر بیلدیریب، کسللیک ترقه‌لیشی نینگ آلدینی آلیش اوچون حاضرچه یېترلی طبي چاره‌لر کۉریلمه‌گنینی ایتگن.
جهان ساغلیقنی سقلش تشکیلاتی معلوماتلریگه کۉره، دنگی ایسیتمه‌سی اېدېس چیبینی آرقه‌لی آدملرگه یوقه‌دیگن ویروسلی کسللیکدیر. اوشبو کسللیک‌نینگ علامتلری یوقاری ایسیتمه، باش آغریغی، بېل آغریغی و بوتون تنه بۉیلب دواملی قیچیشیشنی اۉز ایچیگه آله‌دی.
