امریکا قۉشمه ایالتلری مرکزی استخبارات ادارهسی (سیآیای) سپتمبر خروجلرینینگ۲۵ ییللیگی مناسبتی بیلن ۷۱ته مخفي گزارشنی جماعتچیلیککه اعلان قیلدی. اوشبو حجتلر امریکا حکومتی القاعده نینگ امریکا حدودیده اوچاقلردن فایدهلنیب هجوم قیلیش نیتیدن خبردار بۉلگنینی کۉرسهتهدی.
اوشبو گزارش جمعه کونی (۲۰-سنبله) ۲۰۰۱ییل ۱۱-سپتمبر خروجلرینینگ ۲۵ ییللیگی مناسبتی بیلن اعلان قیلینگن.
اعلان قیلینگن۷۱ ته مخفي حجت امریکا مرکزي استخبارات ادارهسی نینگ جمهور رییس گه تقدیم اېتیلهدیگن کوندهلیک حساباتلری بۉلیب، اولرده ۱۹۹۸–۲۰۰۱-ییللر آرهلیغیده کمیده ۱۳ته حسابات بیل کلینتون، ینه۷ ته حسابات اېسه جارج بوشگه القاعده یېتکچیسی بن لادننینگ امریکاگه هجوم قیلیش نیتی حقیده معلومات بېرگنی کۉرسهتیلگن.
جملهدن، اوچته حساباتده امریکاگه اوچاقدن فایدهلنیب هجوم قیلیش احتمالی حقیده انیقراق معلوماتلر کېلتیریلگن.
۱۹۹۸-ییل ۱۰-سپتمبرده، بیل کلینتون جمهور رییسلیگی دوریده تیارلنگن «بن لادن نینگ موقعی و مقصدلری» ناملی حساباتده اوچاق یاردمیده هجوم قیلیش احتمالی ایلگری سوریلگن.
گزارشده ایتیلیشیچه، شرقي افریقادهگی امریکا اېلچیخانهلریگه – (کنیا و تانزانیا) اېلچیخانهلرگه – قیلینگن هجوملر بیلن باغلیق ترماق «پارتلاوچی مادّهلر آرتیلگن اوچاق»نی امریکاگی شهرلردن بیریگه اوریب یوباریشی ممکن.
۱۹۹۸-ییل ۴-دسمابرده اېسه «بن لادن امریکا اوچاقلرینی آلیب قاچیش و باشقه هجوملرگه تیارلنماقده» سرلوحهلی حسابات بیل کلینتون گه یېتکزیلگن.
اوشبو حساباتده «امریکا اوچاقینی آلیب قاچیش» احتمالی حقیده آگاهلنتیریلگن همده القاعده ترماغی اعضالری نینگ اوچاق آلیب قاچیشگه تیارگرلیک کۉرهیاتگنی و نیویارکدهگی قونالغهلردن بیریده خوفسیزلیک تېکشیروویدن سیناو طریقهسیده اۉتگنیگه عاید معلوماتلر کېلتیریلگن.
اوچینچی مهم حالت ۲۰۰۱-ییل ۶-اگستده، جورج دبلیو بوش جمهور رییسلیگی دوریده تیارلنگن «بن لادن امریکاده هجوم قیلیشگه قطعي بېل باغلگن» ناملی حساباتدیر.
سیآیای حجتلریگه کۉره، اوشبو حسابات ۱۱-سپتمبر خروجلریدن ۳۶ کون آلدین تقدیم اېتیلگن بۉلیب، اونده بن لادن نینگ امریکا توپراغیگه هجوم اویوشتیریش بۉییچه اوّلگی رېجهلری و اوچاقلرنی آلیب قاچیش احتمالیگه عاید معلوماتلر هم کېلتیریلگن.
افغانستان و طالبان هم اوشبو حساباتلرده اېنگ کۉپ تیلگه آلینگن موضوعلر قطاریده بۉلگن.
سیآیای حجتلریده طالبان و بن لادن اۉرتهسیدهگی یقین علاقهلر، القاعده یېتکچیسی نینگ افغانستانده بۉلگنی همده طالبلرنینگ اونی تاپشیریشگه قرشی اېکنی حقیده بیر نېچه بار سۉز یوریتیلگن.
سیآیای تامانیدن ۱۹۹۸–۲۰۰۱-ییللرده امریک جمهور رییسلریگه تقدیم اېتیلگن حساباتلر بن لادننینگ افغانستانده بۉلیشی القاعده نینگ اۉپیراتسیان فعالیتینی دوام اېتتیریشیگه امکان بېرووچی عامل صفتیده بهالنگنینی کۉرسهتهدی.
گرچه اوشبو حساباتلرده القاعده نینگ ۱۱-سپتمبر خروجیده قۉلهگن هجوم اصولیگه جوده یقین بېلگیلر موجود بۉلسه-ده، اعلان قیلینگن ۷۱ته حسابات نینگ هېچ بیریده، عمومي حجمی ۱۰۱صحیفهدن عبارت بۉلگن اوشبو حجتلرده، ۱۱-سپتمبر خروجلری نینگ انیق بشارتی کېلتیریلمهگن.
۲۵ ییل اوّل، ۲۰۰۱-ییل ۱۱-سپتمبرده القاعدهگه اعضا بۉلگن ۱۹ نفر هجومچی، اولردن ۱۵ نفری سعوديه عربستانیدن بۉلگن، تۉرتته یۉلاوچی اوچاقینی آلیب قاچگن. اولر ایکّی اوچاقنی نیویارکدهگی جهان تجارت مرکزی منارهلریگه، ینه بیر اوچاقنی پنتاگونگه اورگن. تۉرتینچی اوچاق اېسه احتمال کانگرس یاکه آق اویگه یۉنهلتیریلگن بۉلیب، پنسلوانياده قولهگن. خروجلر عاقبتیده جمعی قریب اوچ مینگ کیشی هلاک بۉلگن.
