سیاناننینگ خبر بېریشیچه، امریکا مخفي خدمتی اوشبو تلویزیون، «اماس ناو» و «پولیتیکو» نشرلرینینگ ژورنالیستلرینی آق اویگه کیریشیگه تۉسقینلیک قیلگن.
اوشبو تلویزیوننینگ خبر بېریشیچه، امریکا مخفي خدمتی خادملری بوگون اېرتهلب (شنبه، ۲۸ سنبله) اونینگ ژورنالیستی «بتسی کلاین» نینگ ژورنالیستلیک گواهنامسینی آلیب قۉیگن و اونگه آق اویگه کیریشگه رخصت بېرمهگن.
بو حالت امریکا جمهور رییسی دونالد ترامپ جمعه کونی تروثسوشیال ترماغیده «سیانان»، «اماس ناو» و «پولیتیکو» نشرلرینینگ آق اویگه کیریشینی تعقیقلشینی اعلان قیلگنیدن سۉنگ یوز بېرگن.
اونینگ ایتیشیچه، بو نشرلر اونینگ مأموریتی حقیده «دایم یالغان خبرلر ترقهتهدی یاکه واقعهلرنی تۉقیب چیقرهدی».
سیانان ژورنالیستی بتسی کلایننینگ ایتیشیچه، آق اوی حدودیگه کیرگنیده، کیریش کارتینی تېکشیرووچی قوریلمه اونینگ تۉرت خانهلی کودینی قبول قیلمهگن. شوندن سۉنگ خوفسیزلیک خادیمی اونینگ کارتینی آلیب قۉییب، کارت فعالیتی توختهتیلگنینی ایتگن.
اونینگ قۉشیمچه قیلیشیچه، خوفسیزلیک خادیمیدن کارتی نېگه فعالسیزلنتیریلگنیگه ایضاح بېریشنی سۉرهگن، بیراق خادم بو بارهده باشقه معلوماتگه اېگه اېمسلیگینی بیلدیرگن.
سیانای بیاناتیده امریکا اساسی قانونیگه موافق، «حکومت تامانیدن تۉسقینلیک یاکه ارهلشووسیز ژورنالیستلیک فعالیتیمیزنی آلیب باریش حقوقیگه اېگهمیز و بو تعقیق اوشبو بنیادي حقوققه ناقانوني تجاوزدیر»، دېییلهدی.
تلویزیون شونینگدېک، «حکومت و باشقه دولت مؤسسهلرینی جوابگرلیککه تارتیش وظیفهمیزنی بجریشدن توختهمهیمیز همده اوشبو مأموریت نینگ خطی-حرکتلری و سیاستی حقیده قۉرقمسدن و خالص روشده خبر بېریشده دوام اېتهمیز»، دېب تأکیدلهگن.
دونالد ترامپ آق اویگه قَیتگنیدن بویان ییتکرمه بیلن کېسکین مناسبتلرگه اېگه بۉلیب کېلماقده.
ترامپ مطبوعات انجمنلری دوامیده ژورنالیستلرنی بیر نېچه بار «ساخته خبرلر» ترقهتووچی ییتکرمه اوچون ایشلشده عیبلهگن و اولر نینگ سواللریگه جواب بېریشدن باش تارتگن.
